මත්ද්‍රව්‍ය භාවිතයට සිසුන් ඇබ්බැහි වීම නැවැත්වීමට සහ පාසල්වලට එන මත්ද්‍රව්‍ය අල්ලන්න විශේෂ වැඩපිළිවෙළක් ආරම්භ කරන බව අධ්‍යාපන අමාත්‍ය ආචාර්ය සුසිල් ප්‍රේමජයන්ත මහතා පවසනවා.
ඒ කොළඹ (08) පැවති උත්සවයකදීයි.
එහිදී වැඩිදුරටත් අදහස් දැක්වූ අමාත්‍යවරයා කියා සිටියේ “විශේෂයෙන් ම නාගරික පරිසරයේ, ප්‍රධාන පාසල් ආශ්‍රිත ව පාසල් සංවර්ධන සමිති, දෙමාපියන්, ආදිශිෂ්‍යයන් සහ ශිෂ්‍ය නායකයන් එක කාලයක් උදේට පාසල්වලට එන දරුවන්ගේ බෑග් පරීක්ෂා කළා වගේ නැවතත් ඒ කාර්ය කරයි කියලා මං බලාපොරොත්තු වෙනවා.
“දැං මේක වෙන්නෙ නැහැ. ඒ නිසා ටොෆී ලෙස හෝ වෙනත් ආකාරයකින් මත්ද්‍රව්‍ය ළමයින් වෙත එන්න පුළුවන්. මේ පිළිබඳ ව යම් යම් තැන්වල කතාබහ වෙනවා. ඒක නිසා චක්‍රලේඛනයක් මගින් ම ලබන සතිය වෙනකොට සියලු පළාත් අධ්‍යක්ෂවරුන් හරහා මේ පරීක්ෂාකිරීම් සිදු කරන්න බලාපොරොත්තු වෙනවා”
“ඉතා ම සූක්ෂම ලෙස මේ මත්ද්‍රව්‍ය පිළිබඳ කටයුතු සිදු වෙනවා. බොහෝ දෙනා මේ ගැන දන්නෙ නෑ. අන්තරායකාරී ඖෂධ පනතේ පැහැදිලි ව තියෙනවා හෙරොයින් ග්‍රෑම් දෙකකට වැඩිය අහු වුණොත් ජීවිතාන්තය දක්වා සිර දඬුවම් දෙන බව. අලුතෙන් ම ඇවිත් තියෙන්නෙ අයිස්. අයිස් සඳහා සංශෝධනයක් ඇවිත් නැති නිසා ඒ ආදේශන කටයුතු සිදු කරගෙන යනවා. දැං එම යල් පැනගිය නීති සංශෝධනයට නීතිපති දෙපාර්තමේන්තුව ක්‍රියා කරගෙන යනවා.
එම නිසා අප පාසල් දරුවන් ආරක්ෂා කරගත යුතුයි. මේ සඳහා ඉතා දැඩි අවධානයක් යොමු කර ලබන සතිය වන විට ම ‘සූම්’ තාක්ෂණික රැස්වීමක් කැඳවා මේ වන විටත් ක්‍රියාත්මක පියවර වන චක්‍රලේඛන නිකුත් කිරීම, ආහාර ඖෂධ ගැන දැනුම්වත් කිරීම, උපදේශන ගුරුවරුන් පත් කර තිබීම වැනි සාම්ප්‍රදායික ක්‍රමවලින් එහාට ගොස් පෙර ගැටුම්කාරී යුගයේ බෝම්බවලට බියෙන් සුපරීක්ෂාකාරී ව සිටි ලෙසින් දෙමාපියන්ගේ මෙන් ම පාසල් ප්‍රජාවගේත් දැනට වඩා දැඩි අවධානයක් මේ කෙරෙහි යොමු කෙරෙන ක්‍රියා මාර්ග ගන්නවා.
මේ සම්බන්ධයෙන් මා ඉදිරියේ දී වඩාත් සාධනීය පියවර ගැනීමට අපේක්ෂා කරනවා.” යැයි අමාත්‍යවරයා ප්‍රකාශ කර සිටියා.
