සේවක අර්ථසාධක අරමුදලෙන් (EPF) සහ සේවා නියුක්තිකයන්ගේ භාර අරමුදලෙන් (ETF) සියයට 25 අධිභාර බද්දක් අයකිරීමේ යෝජනාවට ශ්‍රී ලංකා නිදහස් පක්‍ෂය සම්පූර්ණයෙන්ම විරුද්ධ බව එහි ප්‍රචාරක ලේකම්, පාර්ලිමේන්තු මන්ත්‍රී ශාන්ත බණ්ඩාර මහතා පැවසීය.
මේ වන විට විදෙස්ගතව සිටින පක්‍ෂ නායක, හිටපු ජනාධිපති මෛත්‍රීපාල සිරිසේන මහතා යළි මෙරටට පැමිණි පසු පක්‍ෂ දේශපාලන මණ්ඩලය, මධ්‍යම කාරක සභාව සහ පරිපාලන කමිටුව එක්ව මේ ගැන සාකච්ඡා කර ඉදිරියේදී කටයුතු කළ යුතු ආකාරය ගැන තීරණයක් ගැනීමට බලාපොරොත්තු වන බව ද මන්ත්‍රීවරයා සඳහන් කළේය.
මෙම අරමුදල්වලින් අධිභාර බද්දක් අයකරගැනීමේ යෝජනාවට විෂය භාර ඇමතිවරයා ද විරුද්ධත්වය පළ කර ඇතැයි කී ශාන්ත බණ්ඩාර මහතා සාර්ථක වනු ඇතැයි තමන් නොසිතන බව ද කීවේය.
ශාන්ත බණ්ඩාර මහතා මේ බව පැවසුවේ කොළඹ, ඩාර්ලි පාරේ පිහිටි එම පක්‍ෂ මූලස්ථානයේ දී ඊයේ (11) පැවති මාධ්‍ය හමුවක් අමතමිනි.
ඊ.ටී.එෆ් සහ ඊ.පී.එෆ් අරමුදල්වලින් එම බද්ද අයකිරීම වැඩකරන ජනතාවට විශාල වශයෙන් බලපාන ප්‍රශ්නයක් බැවින් ජනාධිපතිවරයා හා මුදල් අමාත්‍යවරයා සමඟත් ඒ ගැන සාකච්ඡා කිරීමට බලාපොරොත්තු වන බව මන්ත්‍රීවරයා කීවේය.
කොරියාවේ සංචාරයක නිරතව සිටි පක්‍ෂ නායක, හිටපු ජනාධිපති මෛති‍්‍රපාල සිරිසේන මහතා මෙරටට පැමිණි සැණින් දේශපාලන මණ්ඩලය, මධ්‍යම කාරක සභාව සහ පරිපාලන කමිටුව රැස්වී මේ පිළිබඳව සාකච්ඡා කර ඉදිරියේදී පක්‍ෂය ගන්නා තීරණය ප‍්‍රකාශ කරන බවද ඒ මහතා කීය.
කම්කරු ඇමැති නිමල් සිරිපාල මහතා ද මෙම තීරණයට විරුද්ධ බවද ශාන්ත බණ්ඩාර මහතා පැවසීය.
