සිය ගුවන තහනම් කලාපයක් කිරීමට යුක්රේන ජනාධිපතිවරයා දරන උත්සාහයට ඇමරිකාවේ එකඟතාව පළ නො වී ඇති බව වාර්තා වනවා.
ධවල මන්දිර ආරංචි මාර්ග සඳහන් කරන්නේ, එම ක්‍රියා කලාපයට අනුකූලතාව දැක්වීම හරහා ඇමෙරිකාව රුසියාව සමග සෘජු යුධ ගැටුමකට ඇද දැමෙන බවයි.
රුසියානු හමුදාවන්ගෙන් නිරන්තරයෙන් එල්ල වන ෂෙල් වෙඩි සහ මිසයිල ප්‍රහාර හේතුවෙන් සිය ගුවන් කලාපය තහනම් ගුවන් කලාපයක් ලෙස නම් කරන බව යුක්රේන ජනාධිපතිවරයා ඊයේ ප්‍රකාශ කළා.
ඔහු මෙම ප්‍රකාශය සිදු කළේ, යුක්රේන අගනුවර වන කිව් වෙත ඇතුළු වීම සඳහා රුසියානු හමුදා සහ සන්නද්ධ රට රථ කිලෝමීටර් 50ක පමණ දිගු පෝලිමක රැඳී සිටින අවස්ථාවකදීයි.
ජාත්‍යන්තර චන්ද්‍රිකා ඡායාරූප රුසියානු හමුදාවන්ගේ මෙම පෙළගැස්ම මාධ්‍ය ඔස්සේ ප්‍රචාරය කර තිබුණා.
කෙසේ වෙතත් රුසියානු හමුදාවන්ට මෙතෙක් යුක්රේනයේ අගනුවර සම්පූර්ණ පාලනය අත්පත් කර ගැනීමට හැකියාවක් ලැබී නැහැ.
මේ අතර සිය විමුක්ති අරගලය සඳහා සහයෝගය දැක්වීමට කැමති වෙනත් රටවල හමුදා සහ සන්නද්ධ කණ්ඩායම්වලට ඒ සඳහා එක්වන ලෙස යුක්රේන ජනාධිපති වොලදමීර් සෙලෙන්ස්කි ප්‍රකාශ කළා.
ඔහු කියා සිටියේ, මෙලෙස සිය සටනට සහයෝගය දැක්වීම සඳහා එක්වන ඕනෑ ම ආකාරයක සන්නද්ධ කණ්ඩායම් පිළිගැනීමට සිය හමුදාවන් සහ රට වැසියන් කැමැත්තෙන් සිටින බවයි.
