ලොව විශාලතම කාන්තා ත්‍රාසජනක අභියෝගතා තරගාවලියක් වන රෙයිඩ් ඇමසෝන් (Raid Amazone) තරගාවලිය අද ශ්‍රී ලංකාවේදි ආරම්භ වීමට නියමිතව තිබෙනවා.
කොවිඩ් වසංගතයෙන් පසු ශ්‍රී ලංකාවේ පැවැත්වෙන විශාලතම සංචාරක ක්‍රීඩා සැණකෙළිය මෙය බව සංචාරක අමාත්‍යාංශය සඳහන් කළේය.
තරගාවලිය පැවැත්වෙන්නේ සීගිරිය ආශ්‍රීතව බවත් සංචාරක අමාත්‍යාංශය සඳහන් කළේය.
වැඩසටහනේ පළමු අදියර අද (16) වන දින සිට 22 වන දින දක්වාත් දෙවන අදියර මාර්තු මස 28 වන දින සිට අප්‍රියෙල් 06 වන දින දක්වාත් පැවැත්වීමට නියමිතය. සීගිරිය, කවුඩුල්ල, මැදිරිගිරිය, වෑවල, කන්ඩලම, මහවිල්ගමුව යන ස්ථානවල මෙම තරග ඉසව් සංවිධානය කර තිබේ.
මෙවර ශ්‍රී ලංකාවේ පැවැත්වෙන්නේ Raid Amazone තරග මාලාවේ 20 වැන්නැයි.
ශ්‍රී ලංකන් ගුවන් සමාගම Raid Amazone 2022 තරගයේ ප්‍රධාන ගුවන් සේවා සත්කාරක ලෙස කටයුතු කරයි. සංචාරක ප්‍රවර්ධන කාර්යංශයේ සහයෝගයෙන් එය සංවිධානය කෙරේ.
