ගාල්ල කරාපිටිය රෝහලේ පිළිකා ඒකකයට වසර දෙකහමාරකට පෙර ගෙන්වන ලද කෝටි 10 ක් පමණ වටිනා ලීනියා ඇක්සලරේටර් යන්ත්‍රයෙන් මෙතෙක් කිසිදු ප්‍රයෝජනයක් ගෙන නැතැයි ගාල්ල දිස්ත්‍රික් සම්බන්ධීකරණ කමිටුවේ දී අනාවරණය විය.
එම කමිටුවේ සම සභාපති පාර්ලිමේන්තු මන්ත්‍රී විජේපාල හෙට්ටිආරච්චි මහතා මේ පිළිබඳ විමසූ අවස්ථාවේ දී පිළිතුරු දෙමින් ගාල්ල කරාපිටිය රෝහලේ නියෝජ්‍ය වෛද්‍ය සී.ඩී.පතිරණ මහතා පැවසුවේ යන්ත්‍රය ස්ථාපිත කිරීමේ කටයුතු කරගෙන යන බවයි.
නමුත් යන්ත්‍රය මෙතෙක් භාවිතයට ගත නොහැකි වූ බව ද වෛද්‍ය පතිරණ මහතා කීවේය.
“මෙම යන්ත්‍රය ඇතුළට ගැනීම සඳහා පිවිසුමක් සකස් කිරීමේ දී ඇතිවූ මතවාදයක් හේතුවෙන් යන්ත්‍රය සවිකිරීම ප්‍රමාද වූණා. එම ප්‍රශ්න විසඳා දැන් යන්ත්‍රය අදාළ ස්ථානයට ගෙන ආවා. දැන් ස්ථාපිත කිරීමේ කටයුතු කරගෙන යනවා“ යැයි ඒ මහතා පැවසීය.
සම්බන්ධීකරණ කමිටු සම සභාපති පාර්ලිමේන්තු මන්ත්‍රී විජේපාල හෙට්ටිආරච්චි මහතා මෙසේ කීවේය.
රජය කෝටි ගණනක් වියදම් කරලා මෙවැනි අත්‍යාවශ්‍ය යන්ත්‍ර රෝහල්වලට දුන්නත් පරිපාලනයේ දුර්වලතා හේතුවෙන් අහිංසක රෝගීන්ට එවැනි යන්ත්‍ර වලින් ප්‍රයෝජන ගැනීමට තිබෙන අවස්ථාව අහිමි වෙනවා. මේ ගැන වහාම අවධානය යොමු කරලා එහි වැඩ අවසන් කළ යුතුයි.
