කළු ගඟ ද්‍රෝණියේ මධ්‍යම සහ පහළ ධාරා ප්‍රදේශවල බොහෝ ස්ථානවලට මිලි මීටර් 175 කට අධික වර්ෂාපතනයක් ලැබී ඇතැයි වාරිමාර්ග දෙපාර්තමේන්තුව පවසනවා.
ඒ අනුව හොරණ, අගලවත්ත, ඉංගිරිය, පාලින්ද නුවර, බුලත්සිංහල, දොඩංගොඩ, මිල්ලනිය, මදුරාවල සහ කළුතර ප්‍රාදේශීය ලේකම් කොට්ඨාශවලට අයත් කළු ගඟ නිම්නයේ පහත්බිම් ප්‍රදේශවල දැනට පවතින සුළු ගංවතුර තත්ත්වය තවදුරටත් වර්ධනය විය හැකි බවයි වාරිමාර්ග දෙපාර්තමේන්තුව පවසන්නේ. එම බලපෑම ඉදිරි පැය 24 ඉක්මවා පවතිනු ඇති බවට ද එම දෙපාර්තමේන්තුව අනතුරු ඇගවීමක් නිකුත් කළා. අවදානම් ප්‍රදේශවල ජනතාව මේ පිළිබඳ දැඩි සැලකිල්ලෙන් කටයුතු කරන ලෙසට ද වාරිමාර්ග දෙපාර්තමේන්තුව ඉල්ලීමක් කරනවා.
කැලණි ගඟ ආශ්‍රිතව නඩත්තු කරනු ලබන ගංඟා ජලමාපකවල ජල මට්ටම් ඉදිරි පැය කිහිපය තුළ උතුරා යන මට්ටමට ළඟාවිය හැකි බව වාරිමාර්ග දෙපාර්තමේන්තුව පවසයි.
ඒ හේතුවෙන් දෙහිඹ්විට, රුවන්වැල්ල, සීතාවක, දොම්පේ, හෝමාගම, කඩුවෙල, බියගම, කොලොන්නාව, කොළඹ සහ වත්තල ප්‍රාදේශීය ලේකම් කොට්ඨාසවලට අයත් කැලණි ගංඟා නිම්නයේ පහත්බිම් ප්‍රදේශවල ඇති වී තිබෙන සුළු ගංවතුර තත්ත්වය තවදුරටත් සැලකියයුතු මට්ටමේ ගංවතුර තත්ත්වයක් දක්වා වර්ධනය වියහැකි බවට එම දෙපාර්තමේන්තුව ජනතාවය අනතුරු අඟවයි.
මේ අතර කළු ගඟ, ගිං ගඟ සහ අත්තනගලු ඔය ආශ්‍රිතව ද ජල මට්ටම් ඉහළ යමින් ඇති බව වාර්තා වේ.
එම ගංගා ආශ්‍රිත පහත්බිම්වල වෙසෙන ජනතාවද අවධානයෙන් පසුවිය යුතු බව ආපදා කළමනාකරණ මධ්‍යස්ථානය දැනුම් දෙයි.
අධික වර්ෂාව හේතුවෙන් කළු ගඟ ආශ්‍රිතව පහත් බිම්වල ජීවත්වන ජනතාව අවධානයෙන් සිටින ලෙස ද වාරිමාර්ග දෙපාර්තමේන්තුව දැනුම් දෙයි.
