නිදහස ලබා අවුරුදු 70 ක් තිස්සේම ජනතාව බඩ ගැන පමණක් සිතුවා මිස රට ගැන සිතා වැඩ නොකළ බව ශ්රී ලංකා පොදුජන පෙරමුණේ මහ ලේකම් සාගර කාරියවසම් පවසනවා. ලෝක ආර්ථිකය ඇත්තේ නීති රීති දමා පාලනය කිරීමට නොහැකි තත්ත්වයක බවයි ඔහු වැඩිදුරටත් සඳහන් කළේ.
බඩ ගැන සිතන ගමන්ම රට ගැනත් නොසිතුවොත් අනාගතය ගැන නොසිතා බඩ ගැන සිතා කටයුතු කළේ යැයි අනාගත පරපුර අපට සාප කරනු ඇති බවත් ඒ මහතා පවසයි.
ශ්රී ලංකා පොදුජන පෙරමුණ කාර්යාලයේදී පැවති මාධ්‍ය හමුවකදී ඔහු මෙසේ පැවසීය.
ලෝක ආර්ථිකය මේ වනවිට අර්බුදයක ඇති බවත් ශ්රී ලංකාවටද එය බලපාන බවත් පැවසූ ඔහු ලෝක ආර්ථික තත්වය ශ්රී ලංකාවට පාලනය කළ නොහැකි එකක් බවද කියා සිටියේය.
