ජනවාරි තුන්වන සතියේ සිට ඉන්ධන හිගයකට මුහුණ දීමේ අවධානමක් තිබෙන බව බලශක්ති අමාත්‍ය උදය ගම්මන්පිල මහතා සඳහන් කරයි.
ඉන්ධන හිගයක් ඇති වුවහොත් ගබන් බිමන් යාම සඳහා පාපැදි සහ බක්කි කරත්ත භාවිතා කිරීමට සිදුවනු ඇති බවත්, කෙසේ වෙතත් බක්කි කරත්ත සඳහා භාවිතා කරන ගොණුන් නොමැති නිසා පාපැදිය එකම ප්‍රවාහන මාධ්‍යය වනු ඇති බවත් පෙන්වා දෙන ගම්මන්පිල මහතා පවසන්නේ පාපැදියකින් යා හැකි උපරිම දුර පමණක් ගමන් කිරීමට ජනතාවට සිදුවනු ඇති බවයි.
අවදානමක් ඇති නමුත් එය සිදුවන්නේ ක්ෂණිකව නොවන බවද පවසන අමාත්‍යවරයා ඉන්ධන ආනයනය සඳහා අවශ්‍ය ඩොලර් සපයා ගත නොහැකි වුවහොත් මෙම තත්ත්වය ඇතිවන බවද කියා සිටියි.
තමන් මේ සම්බන්ධයෙන් අමාත්‍ය මණ්ඩලය කිහිපවිටක්ම දැනුවත් කර ඇති බවද පැවසූ ඔහු වෙනත් අත්‍යවශ්‍ය භාණ්ඩ සඳහා විකල්පයන් සපයා ගත හැකි තත්ත්වයක් තිබුණද ඉන්ධන සඳහා එවන් විකල්පයක් නැති බවද කියා සිටියේය.
පරිප්පු නොමැති නම් මුංඇට වැනි ධාන්‍ය වර්ගද අර්තාපල නොමැති නම් බතල, මඤ්ඤොක්කා වැනි අල වර්ගද ආදේශක ලෙස භාවිතා කළ හැකි නමුත් ඉන්ධන සඳහා ආදේශක නොමැති බැවින් රට සතුව තිබෙන සීමිත ඩොලර් ප්‍රමාණය ඉන්ධන සඳහා භාවිතා කිරීමට සිදුවනු ඇති බවද ඇමතිවරයා පවසනවා. එසේ නොමැති නම් ප්‍රමාණවත් පරිදි ඩොලර් සපයා ගත යුතු බවයි ඔහු සඳහන් කරන්නේ.
ඉන්ධන හිගයක් ඇතිවීම වළක්වා ගැනීම සඳහා ජනතාව දැන් සිටම අල්පෙච්ඡ, සරළ ජීවිතයකට අනුගත වීමට සිදුවන බවත්, විදේශ විනිමය නාස්ති කරන භාණ්ඩ විශාල ප්‍රමාණයක් භාවිතා කිරීමෙන් වැළකී සිටීමට සිදුවන බවත් ගම්මන්පිල මහතා පෙන්වා දෙනවා. අවවාදයට වඩා ආදර්ශය උතුම් බැවින් තමාද හැකිතරම් අනවශ්‍ය වියදම් කපාහැර සරල ජීවිතයකට හුරු වී ඇති බවයි ඔහු වැඩිදුරටත් පවසන්නේ.
ගුවන් විදුලි නාලිකාවක සාකච්ඡාවක දී ඔහු මෙම අදහස් පල කරන ලදි.
