කාබනික පොහොර වැඩසටහන කල්දමන ලෙසත්, මේ අයුරින් ගියහොත් අපටද පාරට බැසීමට නොහැකි වනු ඇති බවත් ශ්‍රී ලංකා නිදහස් පක්ෂයේ මහලේකම්, රාජ්‍ය අමාත්‍ය දයාසිරි ජයසේකර මහතා පැවසීය.
ඒ මහතා සඳහන් කළේ කාබනික පොහොර වැඩසටහන යළි ඉදිරිපත් කිරීම නිවැරදි ක්‍රමවේදයක් සහ කාලරාමුවක් යටතේ සිදුකළ යුතු බවය.
ඔහු මේ බව පැවසුවේ ඊයේ (13) පෙරවරුවේ වයඹ පළාත් සභාවට පැමිණ සිටි අවස්ථාවේදී මාධ්‍යවේදීන් හමුවේ අදහස් දක්වමින්ය.
“පොහොර අර්බුදය සම්බන්ධයෙන් ආණ්ඩු පක්ෂයේ මන්ත්‍රීවරු විශාල පිරිසක් යම් වෙනත් මතයක ඉන්නවා. ජනාධිපතිතුමාට ඒ අය ලිපියක් යවයි. මේ යෝජනාව පොඩ්ඩක් කල්දාගන්න කියලා. ජනාධිපතිතුමා ගත්ත ක්‍රියාමාර්ගයට අපේ අකමැත්තක් නෑ. නමුත් කාබනික පොහොරවලින් 100%ක් දියුණු වෙච්ච රටක් ලෝකෙ කොහෙවත් නෑ. එක කන්නෙකින් මේක කරන්න ගියාම තිබෙන අර්බුදය තමයි මේ තියෙන්නේ. අද හෙක්ටයාර ලක්ෂ 08ක් සාමාන්‍යයෙන් වී වගා කරනවා. දැම්මම හෙක්ටයාර හයහමාරකට අඩුවෙලා. මේක දුන්න විශේෂඥයින්ට අපි දැන් කියන්නේ කරුණාකරලා මේවට උත්තර දෙන්න. මොකද මේක තුළ වෙන්නේ ජනාධිපතිතුමාත් ආණ්ඩුවත් විනාශ කරන වැඩපිළිවෙලක්. මේවා කියනකොට අපිට ගහන එක නෙමෙයි කරන්න තියෙන්නේ. ජනාධිපතිතුමාගෙන් අපි ඉල්ලන්නේ මේ තීන්දුව යම්කිසි ප්‍රමාණයකින් ආපසු කල්දාලා නිවරැදි ක්‍රමවේදයක් හා කාලරාමුවක් හදා ගන්න කියලා. නැත්නම් අපිටත් පාරට බහින්න බැරුව යනවා. ආණ්ඩුවේ හිටියත් ඇත්ත දේ අපි කතා කරනවා. ඒකට කවුරුත් කලබල වෙන්න ඕනේ නෑ.”
මේ අතර ගුරු – විදුහල්පති වැටුප් ගැටලුව සම්බන්ධයෙන් ද රාජ්‍ය අමාත්‍යවරයා අදහස් පළ කළේය.
“ගුරු ප්‍රශ්නයත් අද විශාල අර්බුදයක් වෙලා. ඔවුන්ව රුපියල් 5,000ක් දෙනවා කියලා රවට්ටලා හරියන්නේ නෑ. ඒ අවශ්‍යකරණ නීතිමය ක්‍රියාමාර්ග ලිඛිතව ලබාදීමේ වැඩපිළිවෙල තියෙන්න ඕනේ. ගුරුවරු සූදානම් ගිහින් වැඩකරන්න. හැබැයි ආණ්ඩුවෙන් ස්ථීර විසඳුමක් බලාපොරොත්තු වෙනවා. ඔවුන් ඉල්ලන්නේ නීතිගත කරපු වැඩපිළිවෙලක්. ගුරුවරුන්ගේ ඉල්ලීම ඉතාම සාධාරණ ඉල්ලීමක්.”
