ආණ්ඩු මාරුවකින් හෝ මුහුණු මාරුවකින් පමණක් රට මුහුණදී ඇති ප්‍රශ්න විසඳිය නොහැකි බව ජාතික ජන බලවේගයේ පාර්ලිමේන්තු මන්ත්‍රී අනුර කුමාර දිසානායක මහතා පවසනවා.
කෑගල්ලේ පැවැති වැඩසටහනකදී ජනතා විමුක්ති පෙරමුණේ නායක අනුර කුමාර දිසානායක මහතා ඒ බව පැවසුවා.
“තවදුරටත් හුදු ආණ්ඩු මාරුවකින් හෝ මුහුණු මාරුවකින් විතරක් මේ ප්‍රශ්නය විසඳන්න බෑ. මේ ප්‍රශ්නය විසඳන්න නම් අපේ රටේ දේශපාලනය වෙනස් කරන්න ඕනේ. සමාජයේ සාමුහිකත්වය, රටේ නිෂ්පාදනයට ජනතාව හවුල්වීම සහ නිෂ්පාදනයේ සාධාරණ පංගුව ජනතාවට ගලායෑමේ නව ආර්ථිකයකට අපේ රට පරිවර්තනය කරන්න ඕනේ. එහෙම නැතුව මේ රට හදන්න බෑ.”
“ඇමතිවරුන්ගේ ලයිට්බිල 119,000යි, 120,000යි. මාසේ ලයිට් බිල. ආණ්ඩුවෙන් ගෙවන්නේ. පොඩ්ඩක් කල්පනා කරලා බලන්න.”
“අපේ රටේ දේශපාලකයා මහජනයාට උඩින් වරප්‍රසාද ගන්නවා. ජනතාවගේ ධනය නාස්ති කරන ආණ්ඩු ක්‍රමයක් තියෙන්නේ.”
“මේ රට හදන්න නම් පුරවැසියට දැනෙන්න ඕන දේශපාලකයා මේ වැඩේට ලෑස්තියි කියලා. එහෙම දැනෙන්න නම් දේශපාලකයා තමන්ගේ වරදාන වරප්‍රසාද අයින් කරන දේශපාලනයක් ඕනේ. ඒක අපි කරනවා.”
“මන්ත්‍රිවරුන්ගේ විශ්‍රාම වැටුප, මන්ත්‍රි වාහන බලපත්‍ර, ඇමතිවරුට දෙන නිවාස, ජනාධිපතිවරුන්ගේ හතරවටේ තියෙන නිවාස, හිටපු ජනාධිපතිවරු බලාගන්න එක ඔක්කොම නතර කරන තීන්දුවක් ගන්නවා.”
