මාවනැල්ලේ ගල් කොරියක පුපුරණ ද්‍රව්‍ය අතුරුදන්වීම සැළකිල්ලට ගෙන ගල් කොරිවලට ලබා දෙන පුපුරණ ද්‍රව්‍ය නිසි පරිදි භාවිතා කිරීම හා ගල්කොරි අධීක්ෂණයට විශ්‍රාමික හමුදා නිලධාරියෙක් පත්කිරීමට තීරණය කර තිබේ.
එම නිලධාරියා භූ විද්‍යා සමීක්ෂණ හා පතල් කාර්යාංශයට අනුයුක්තව පත්කිරීමට නියමිතය.
මේ අතර, දිනකට කැඩිය හැකි කළුගල් ප්‍රමාණය අනුව වෙඩි බෙහෙත් නිකුත් කෙරෙන අතර මාවනැල්ලේ ගල් කොරියක තිබු පුපුරණ ද්‍රව්‍ය අතුරුදන්වීමත් සමග ඒවා වෙනත් බාහිර පාර්ශ්වයක් වෙත කිසියම් කඩාකප්පල්කාරී ක්‍රියාවන් සඳහා ලබාදුන්නේද යන්න කෙරෙහි අවධානය යොමු වී ඇතැයි ද පරිසර අමාත්‍ය මහින්ද අමරවීර මහතා පවසයි.
රටේ සියලු ගල්කොරිවල කටයුතු විදිමත් පරිදි අධීක්ෂණය සඳහා පියවර ගැනීමට පරිසර අමාත්‍යාංශයේ අවධානය යොමු වී ඇතැයි ද අමාත්‍යවරයා සඳහන් කරයි.
කළු ගලක් කැණීම සඳහා භූ විද්‍යා සමීක්ෂණ හා පතල් කාර්යාංශය විසින් බලපත් ලබාදීමෙන් පසු පුපුරණ ද්‍රව්‍ය ලබාගැනීම සඳහා ඒ සම්බන්ධ වාර්තාවක් ආරක්ෂක අමාත්‍යාංශයට යොමුකෙරේ.
