කොළඹ කොටස් වෙළෙඳපොළේ ලැයිස්තුගත සමාගම් අතුරින් ඉහළම ප්‍රාග්ධනීකරණයකට හිමිකම් කියනු ලබන සමාගම බවට LOLC හෝල්ඩිංග්ස් පීඒල්සී අද (27) පත්විය. ඒ අද දින ගනුදෙනු අතරවාරයේ දී LOLC හෝල්ඩිංග්ස් හි කොටසක ගනුදෙනු මිල රු. 505.00 ක් ලෙසින් වාර්තා වීමත් සමඟිනි.
ඊයේ (26) දින ගනුදෙනු අවසානයේ දී අංක 03 ස්ථානයේ සිටි LOLC හෝල්ඩිංග්ස් අද දිනයේ දී මෙම ලැයිස්තුවේ අංක 01ට සිටි ජෝන් කීල්ස් හෝල්ඩිංග්ස් සහ අංක 02 ස්ථානයේ පසු වූ ලංකා දුම්කොළ සමාගම අභිබවා යාමට සමත් විය.
මෙහිදී LOLC හෝල්ඩිංග්ස් හි වෙළෙඳපොළ ප්‍රාග්ධනීකරණය රු. බිලියන 239 ක් ඉක්මවා ගොස් තිබුණේ සමස්ත වෙළෙඳපොළෙන් 6% ක් ඉක්මවූ පංගුවකට හිමිකම් කියමිනි.
අද පෙරවරුවේ පළමු ගනුදෙනු හෝරාව තුළ දී කොළඹ කොටස් වෙළෙඳපොළෙන් රු. බිලියන 200 ඉක්මවූ වෙළෙඳපොළ ප්‍රාග්ධනීකරණයකට හිමිකම් කියන සමාගම් 3 ක් සහ රු. බිලියන 100 ඉක්මවූ වෙළෙඳපොළ ප්‍රාග්ධනීකරණයකට හිමිකම් කියන සමාගම් 4 ක් වාර්තා වී තිබේ.
සමාගමක වෙළෙඳපොළ ප්‍රාග්ධනීකරණය ගණනය කරනුයේ සමාගමේ නිකුත් කරන ලද කොටස් ප්‍රමාණය, එම සමාගමෙහි කොටසක වෙළෙඳපොළ මිලෙහි ගුණිතයක් ලෙස ගැනීමෙනි. නිකුත් කරන ලද කොටස් ප්‍රමාණය වෙනස් නොවන විට සමාගමේ කොටස් මිල උච්ඡාවචනය වන අවස්ථාවේ දී එම සමාගමේ වෙළෙඳපොළ ප්‍රාග්ධනීකරණය ද ඉහළ පහළ යනු ඇත.
මෙලෙස කොටස් වෙළෙඳපොළේ ලැයිස්තුගත කර ඇති සියලු සමාගම්වල වෙළෙඳපොළ ප්‍රාග්ධනීකරණයෙහි එකතුව සමස්ත වෙළෙඳපොළ ප්‍රාග්ධනීකරණය වේ. ඊයේ දිනයේ ගනුදෙනු අවසානයේ දී කොළඹ කොටස් වෙළෙඳපොළ සමස්ත වෙළෙඳපොළ ප්‍රාග්ධනීකරණය අගය රු. ට්‍රිලියන 3.78 ක් විය.
