යුරෝපා සංගමයේ ත්‍රස්තවාදී ලැයිස්තුවෙන් එල්. ටී. ටී. ඊ. සංවිධානය ඉවත් කිරීමට යුරෝපා සංගම් අධිකරණයක් තීරණය කර තිබේ.
පලස්තීනයේ ඉස්ලාමීය සංවිධානයක් වන හමාස් සංවිධානය තවදුරටත් ත්‍රස්තවාදී ලැයිස්තුවේ තැබීමට ඔවුන් තීරණය කර ඇත.
ශ්‍රී ලංකාවේ ත්‍රස්තවාදී සංවිධානයක් වු එල්. ටී. ටී. ඊය පරාජය කිරීමෙන් පසු ඔවුන්ගේ කිසිඳු ත්‍රස්තවාදී ක්‍රියාවක් වාර්තා නොවීම හේතුවෙන් මෙම තීරණය ගන්නා බව යුරෝපා සංගම් අධිකරණය පෙන්වාදී තිබේ.
තවදුරටත් අදාළ ලැයිස්තුවේ එල්.ටී.ටී.ඊ. සංවිධානය රඳවා තැබීමට ප්‍රමාණවත් සාක්ෂි නොමැතිවීම හේතුවෙන් මෙම පියවර ගෙන ඇති බවද සඳහන්ය.
යුරෝපා සංගම් අධිකරණයේ මෙම තීරණයත් සමග එල්. ටී. ටී. ඊ. සංවිධානයට අයත් අරමුදල් තහනම් කිරීම ද නතරවනු ඇත.
යුරෝපා සංගමය විසින් ත්‍රස්තවාදී සංවිධාන ලැයිස්තුවක් නිර්මාණය කරනු ලැබුවේ 2001 වසරේ සැප්තැම්බර් 11 වනදා පෙන්ටගනයට එල්ලවු ත්‍රස්ත ප්‍රහාරයත් සමගය.
එය අවසන් වරට පසුගිය ජනවාරි මාසයේදී යාවත්කාලීන කර තිබේ.
එම ත්‍රස්තවාදී ලැයිස්තුවට මේවන විට ත්‍රස්තවාදීන් 13 දෙනෙකු සහ සංවිධාන 22 ක් ඇතුළත්ය.
පිලිපීනයේ කොමියුනිස්ට් පක්ෂය මෙන්ම පේරු රාජ්‍යයේ මාවෝ සංවිධානය ද ඊට ඇතුළත් වෙයි.
හමාස් සංවිධානය යුරෝපා සංගමයේ ත්‍රස්තවාදී ලැයිස්තුවට ඇතුළත් කරනු ලැබුවේ 2003 වසරේදීය.
එල්. ටී. ටී. ඊ. සංවිධානය 2006 වසරේදී ත්‍රස්තවාදී ලැයිස්තුවට එක්කර තිබේ.
