සියලු අමාත්‍යාංශ සහ රාජ්‍ය ආයතනවල ක්‍රියාකාරිත්වය සොයා බැලීම සඳහා ඒ ආයතනවලට හදිසියේ කඩා පනින කණ්ඩායම් යෙදවීමේ වැඩපිළිවෙළක් ජනාධිපති ගෝඨාභය රාජපක්ෂ මහතාගේ උපදෙස් මත ආරම්භ කර ඇත.
මෙලෙස එක්වර පැමිණෙන පිරිස අතර ජනාධිපති, අගමැති, ඇමැතිවරු මෙන්ම රජයේ උසස් නිලධාරීන්ද සිටිනු ඇති බව ජනාධිපති ලේකම් කාර්යාල ආරංචි මාර්ග පවසයි.
කලක සිට අක්‍රිය පවතින රාජ්‍ය සේවය විධිමත් කිරීම මෙන්ම සක්‍රිය සේවාවක් ජනතාවට සැලසීම සඳහා නව රජය මේ වැඩපිළිවෙළ ක්‍රියාත්මක කර ඇත.
ඉකුත් සතියේ ජනාධිපති ගෝඨාභය රාජපක්ෂ මහතා මිනින්දෝරු දෙපාර්තමේන්තුවට මෙන්ම නාරාහේන්පිට පිහිටි ආර්ථික මධ්‍යස්ථානය වෙතද එක්වරම ගොස් එම මොහොතේ එහි ක්‍රියාකාරිත්ව පිළිබඳව නිරීක්ෂණය කරනු ලැබීය. ආර්ථික මධ්‍යස්ථානයේ වැඩි මිලට අලෙවි කළ සහල් තොග පිළිබඳ තොරතුරු ලැබීමත් සමඟ ජනාධිපතිවරයා වහා ක්‍රියාත්මක වී අදාළ අංශ වෙත සිය ජංගම දුරකතනයෙන් අමතා වැඩි මුදලට අලෙවි කිරීම නතර කිරීමට පියවර ගන්නා ලෙසට උපදෙස් දී තිබිණි.
එලෙසම මිනින්දෝරු දෙපාර්තමේන්තුවටද මේ ආකාරයටම ගෝඨාභය රාජපක්ෂ මහතා යෑමෙන් පසු එහි සේවක-සේවිකාවන් හා නිලධාරීන් මේ වන විට ඉතා උනන්දුවෙන් සිය රාජකාරි කටයුතු සිදු කරන බව වාර්තා වේ.
මේ වැඩපිළිවෙළ සම්බන්ධයෙන් පවතින සුබදායෙි ප්‍රතිචාර හේතුවෙන් එම කටයුතු විධිමත්ව සිදු කිරීමට අදාළ සැලසුම්ද සකස් කර ඇති බවත්, පෙර නොදන්වා ගොඩවදින විට හඳුනාගැනෙන අඩුපාඩු වහා සකස් කිරීමට අදාළ පියවර ඒ දිනම සැලසුම් වන බවත් මේ ආරංචි මාර්ග තවදුරටත් සඳහන් කළේය.
