රටේ ප්‍රධාන නාගරික නගර හතරක වායු දූෂණය සීඝ්‍රයෙන් ඉහළ ගොස් ඇති බව ජාතික ගොඩනැගිලි පර්යේෂණ සංවිධානය (NBRO) අද ප්‍රකාශ කළේය.
කොළඹ, මහනුවර, යාපනය සහ පුත්තලම යන ප්‍රදේශවල වායු තත්ත්ව දර්ශකයේ ඉතා දුර්වල මට්ටම් වාර්තා වී ඇති බව වායු තත්ත්ව අධ්‍යයනය පිළිබඳ ජ්‍යෙෂ්ඨ විද්‍යාඥ සහ NBRO හි පරිසර අධ්‍යක්ෂ සරත් ප්‍රේමසිරි මහතා පැවසීය.
විද්‍යාඥ සරත් ප්‍රේමසිරි පවසන පරිදි වායු ගෝලයේ පවතින දූෂිත වළාකුළු ශ්‍රී ලංකාවේ ඊසාන දෙසින්, පවතින ඊසාන දිග මෝසම් සුළං සමඟ අභ්‍යන්තරයට ගෙන ඒම නිසා වායු දූෂණය මෙතරම් ඉහළ යාමට හේතු වී ඇත.
මෙහි ප්‍රතිඵලයක් ලෙස බස්නාහිර, උතුර සහ උතුරු නැඟෙනහිර පළාත්වලට විශේෂයෙන් බලපෑම් එල්ල විය හැකි බවද ඔහු වැඩිදුරටත් පැවසීය. “විදුලිය නිපදවීමට ඉන්ධන භාවිතය වැඩි වීමත් සමඟ ඇතැම් ප්‍රදේශවල වායු දූෂණය අනෙක් ප්‍රදේශවලට සාපේක්ෂව ඉහළ ගොස් ඇති අතර එය වායු දූෂණයට ප්‍රධාන හේතුවක් ද වේ,” විද්‍යාඥ සරත් ප්‍රේමසිරි වැඩිදුරටත් සඳහන් කළේය.
