සුවසැරිය නොමිලේ ගිලන්රථ සේවය සඳහා 2022 වසර වෙනුවෙන් වෙන් කර ඇත්තේ රුපියල් මිලියන 1800 ක් බවත් එය කිසිසේත් ප්‍රමාණවත් නොවන බැවින් අවම වශයෙන් තවත් රුපියල් බිලියන 2ක් යෙදිය යුතු බව සමගි ජන බලවේගයේ පාර්ලිමේන්තු මන්ත්‍රී ආචාර්‍ය හර්ෂ ද සිල්වා මහතා පවසා තිබේ.
පසුගිය 6 දා මධ්‍යම රාත්‍රිය වන විට 1990 සුව සැරිය ගිලන් රථ සේවයට ලැබී ඇති ඇමතුම් සංඛ්‍යාව හතලිස් හය ලක්ෂ තිස්තුන් දහසක් බව හෙතෙම පෙන්වා දී ඇත්තේ පසුගියදා පාර්ලිමේන්තු පරිශ්‍රයේදී පැවති සෞඛ්‍ය කටයුතු පිළිබඳ අමාත්‍යාංශයීය උපදේශක කාරක සභාවේදී ය.
ඉදිරියේදී මෙම සේවාවට තවත් ගිලන් රථ 112ක් පමණ යෙදීමට නියමිත බැවින් වෙන් කර ඇති ප්‍රතිපාදන ප්‍රමාණවත් නොවන බව මන්ත්‍රීවරයා සඳහන් කර ඇත.
පාර්ලිමේන්තු මන්ත්‍රී ආචාර්‍ය හර්ෂ ද සිල්වා මහතා ඉල්ලුම් කර ඇති පරිදි අවම වශයෙන් තවත් මිලියන 1200 කින් වත් එම මුදල් ප්‍රමාණය වැඩි කර ගැනීම සඳහා අදාළ පාර්ශ්ව සමඟ සාකච්ජා කරන බව සෞඛ්‍ය අමාත්‍යවරයා කාරක සභාවට දැනුම් දී තිබේ.
