වාහන අවභාවිතය සම්බන්ධයෙන් අත් අඩංගුවට ගෙන රිමාන්ඩ් බන්ධනාගාර ගත කර සිටින පාර්ලිමේන්තු මන්ත්‍රී විමල් වීරවංශ මහතා වාහන අවභාවිතයටත් වඩා බරපතළ ලෙස රාජ්‍ය මුදල් හා දේපළ අවභාවිත කර ඇති බව අනාවරණය වේ. ඒ සම්බන්ධයෙන්ද මේ වන විට පරීක්ෂණ ආරම්භ කර ඇත.
විශේෂයෙන්ම රජයේ නිවාස යෝජනා ක්‍රමවල නිවාස තම ඥාති හිතමිතුරන්ට තුට්ටු දෙකට ලබා දී කෝටි ගණනක මුදල් අවභාවිතා කිරීම ඔහුට එල්ල වී ඇති ප්‍රබලම චෝදනාවකි. මත්තෙගොඩ සහ කහතුඩුව නිවාස යෝජනා ක්‍රමයන්ගේ නිවාස එසේ සොච්චම් මිලට නිවාස ලබා දී විමල්ගේ ඥාතීන්ට බව වාර්තා වේ.
එසේ නිවාස ලබා දී ඇති පුද්ගලයන් අතර විමල්ගේ බාල සහෝදරයා වන ආනන්ද ප්‍රියදර්ශන, විමල්ගේ සොහොයුරියගේ ස්වාමිපුරුෂයා වන ඩබ්. හේමසිරි, විමල්ගේ මස්සිනා වන පී.ඩබ්. රූපසිංහ, විමල්ගේ සහෝදරියගේ පුතා වන වසන්ත කුමාරසිංහ, විමල්ගේ නෑනා වන අයි. එම්. රණවීර, යන අය සිටින බව වාර්තා වන අතර මේ වන විට අල්ලස් හෝ දුෂණ කොමිසම විසින්ද මේ සම්බන්ධව විමර්ශන ආරම්භ කර ඇත.
එසේම මාසික කුලිය රුපියල් ලක්ෂ 5ක් වන බම්බලපිටිය ‘ඕෂන් වීව්‘ ගොඩනැඟිල්ල මාසික කුලිය රුපියල් 50000.00කට හිතවතුකට බදු දීම සම්බන්ධයෙන්ද විමල් වීරවංශ මන්ත්‍රීවරයාට චෝදනා එල්ල වී තිබේ. 2015 ජනාධිපතිවරණ සමයේදී ගුවන් හමුදා යානා ගුවන් ගමන් සඳහා යොදා ගෙන මුදල් නොගෙවීම සම්බන්ධයෙන් ගුවන් හමුදාව විසින් කරන ලද පැමිණිල්ලකට අනුව ද පරීක්ෂණ අරඹා ඇත.
එසේම නිවාස හා ඉදි කිරීම් අමාත්‍යාංශය යටතේ ඇති සියලු ආයතනවලින් එකතු කරගත් රුපියල් 14800000.00ක මුදලින් 2015 ජනාධිපතිවරණ දේශපාලන ප්‍රචාරක පත්‍රිකා මුද්‍රණය කිරීමද මන්ත්‍රීවරයාට එල්ලව ඇති බරපතළ චෝදනාවකි.
එසේම අලෙවි සංවර්ධන නිලධාරීන් බව පෙන්වා ජාතික නිදහස් පෙරමුණේ සාමාජිකයන් 60 දෙනකුට ඉංජිනේරු සංස්ථාවෙන් වැටුප් ගෙවා ඇති බවටද තොරතුරු හෙළි වී තිබේ. මොවුන් ඉංජිනේරු සංස්ථාවේ කිසිදු වැඩබිමක කිසිදා සේවය කර නොමැති අතර ඔවුන්ගේ වැටුප් වෙනුවෙන් රජයේ මුදල් මිලියන 69ක් ගෙවා තිබේ.
ඊට අමතරව බස්නාහිර පළාතේ කොළඹ දිස්ත්‍රික්කයේ හේවාගම් කෝරළයේ අලුබෝවත්ත සහ දෙල්ගහවත්තේ පර්චස් 81.4ක් මිලදී ගෙන මිලියන 18.5ක හා මිලියන 5ක නිවාස දෙකක් ඉඳි කිරීමට මුදල් සපයා ගත් ආකාරය ගැනද මේ වන විට විමර්ශනය කෙරේ.
කෙසේ වෙතත් වාහන අවභාවිතය ඇතුළු මේ සියලු අවභාවිතයන් එක්ව ගත් කළ විමල් වීරවංශ මහතා නිසා රජයට අහිමි වී ඇති මුදල රුපියල් මිලියන 1000ක් පමණ වනු ඇතැයි විශ්වාස කටයුතු ආරංචි මාර්ගවලින් දැනගන්නට ඇත.
අස්ථානගතව ඇති ලේඛන නිසා සෙසු අනභාවිතයන් ගැන විස්තර සපයා ගැනීම දුෂ්කර වී ඇතත් පරීක්ෂණ කටයුතු අඛණ්ඩව සිදු කෙරෙන බව එම ආරංචි මාර්ගවලින් දැන ගන්නට ඇත.
