කෝවිඩ් 19 රෝග මර්දනයට රජය ගන්නා ක්‍රියාමාර්ග සාධනීය නැති බව සඳහන් කර හා අනාගතයේ සිදුවන ව්‍යසනයන්ට වග කිව නො හැකි බව පවසමින්, විශේෂඥ වෛද්‍යවරයෙක් කෝවිඩ් 19 රෝග මර්දන තාක්ෂණික කමිටුවෙන් ඉල්ලා අස් වී තිබෙනවා.
කෝවිඩ් 19 වෛරසය ආසාදිත වූවන් සඳහා ප්‍රතිකාර කරනු ලබන වෛද්‍යවරුන්ගේ ලැයිස්තුවේ ඉදිරියෙන් ම සිටින මෙම වෛද්‍යවරයා පවසා ඇත්තේ, රජය කෝවිඩ් 19 වෛරස පාලනය සඳහා ගනු ලබන තීරණ සාධනීය ඒවා නො වන බව යි.
රට වසා දැමීමේ තීරණය මෙන්ම එන්නත්කරණ ක්‍රියාවලිය ද තාක්ෂණික කමිටුව දුන් උපදෙස් අනුව සිදු නො කළ බවත් ඒවා ප්‍රතිඵල රහිත බවත් ඔහු සඳහන් කරනවා.
උද්ගත ව ඇති තත්ත්වය යටතේ තවදුරටත් කෝවිඩ් 19 මර්දනය හා පාලනය කිරීමේ තාක්ෂණික කමිටුවේ රැඳී සිටීමේ කිසිදු ප්‍රතිඵලයක් ඇති වන බව තමන්ට නො හැඟෙන බව යි මෙම විශේෂඥ වෛද්‍යවරයා සඳහන් කරන්නේ.
එබැවින් අනාගතයේ මතු විය හැකි දුර්විපාකවලට තමන්ට ද කොටස්කරුවකු විය නො හැකි බව ඔහු සඳහන් කළා.
අප සමඟ අදහස් දැක් වූ මෙම විශේෂඥ වෛද්‍යවරයා කියා සිටියේ, මේ වනවිටත් සිය තීරණය සම්බන්ධයෙන් සෞඛ්‍ය සේවා අධ්‍යක්ෂ ජනරාල්වරයා සහ අදාළ බලධාරීන් දැනුවත් කර ඇති බව යි.
විශේෂඥ වෛද්‍යවරයෙක් කෝවිඩ්-19 රෝග මර්දන තාක්ෂණික කමිටුවෙන් ඉල්ලා අස්වෙයි
