බංග්ලාදේශය, නේපාලය, පාකිස්තානය සහ ශ්‍රී ලංකාව යන රටවල මෑතක දී සංචාරය කර ඇති පුද්ගලයින් හට සිය රටට ඇතුළු වීම තහනම් කරනු ලබන බව සිංගප්පූරුවේ COVID-19 බහු අමාත්‍යාංශ කාර්ය සාධක බලකාය අද (අප්‍රේල් 30) පැවසීය. සිංගප්පූරුවේ Channel News Asia පුවත් සේවය මේ බව වාර්තා කර සිටී.
පසුගිය දින 14 ආවරණය වන ආකාරයෙන් ඉහත කී රටවල ගත කර ඇති සියල්ලන් හට මේ අනුව මැයි 02 සිට සිංගප්පූරුව වෙත පැමිණීම තහනම් වන අතර මෙම රටවල සංක්‍රාන්ති (transit) සඳහා දිගුකාලීනව හා කෙටිකාලීනව කාලය ගත කළ අයට ද මෙම නියමය වලංගු වනු ඇත.
සිංගප්පූරු බලධාරීන්ගෙන් පූර්ව ප්‍රවේශ අනුමැතිය ලබා ගත් අයට ද එය අදාළ වන බව කාර්ය සාධක බලකායේ සම සභාපති ලෝරන්ස් වොං මහතා පැවසීය.
මේ අතර බංග්ලාදේශය, නේපාලය, පාකිස්තානය සහ ශ්‍රී ලංකාව යන රටවල සංචාරය කර දැනට සිංගප්පූරුවට පැමිණ ඇති අය හට දින 14 ක නිරෝධායන කාලයක් අනිවාර්යය කර තිබූ අතර මෙය තවත් දින 7 කින් දීර්ඝ කරනු ලබන බව සිංගප්පූරු COVID-19 බහු අමාත්‍යාංශ කාර්ය සාධක බලකාය වැඩිදුරටත් සඳහන් කර සිටී.
