අසාධ්‍ය කොවිඩ් රෝගීන් සඳහා ලබාදෙන, ලෝකයේ දැඩි කතාබහක් ඇති කළ “රෙගන් කෝව්” එන්නත් තොගයක් හෙට (26) දින මෙරටට රැගෙන ඒමට නියමිතය.
මෙම එන්නත පිළිබඳ ලංකාවේදී පළමුවරට තොරතුරු අනාවරණය කළේ විපක්ෂනායක සජිත් ප්‍රේමදාස මහතාය. ඒ, ඉකුත් අගෝස්තු 29 වැනි දිනය.
ඒ අනුව කොරෝනා ආසාදිතයින් 250 දෙනෙකුට ලබාදීමට අවශ්‍ය එන්නත් මාත්‍රා 500 ක් මෙහිදී මෙරටට රැගෙන ඒමට නියමිතය.
ආසාදිතයෙකු සඳහා මිලිග්‍රෑම් 600 ක් සම්පූර්ණ වන පරිදි එන්නත් මාත්‍රා දෙකක් ලබාදිය යුතුව ඇත.
අමෙරිකානු ඩොලර් 500 කට පෞද්ගලික අංශය විසින් මෙම එන්නත් ලබාගෙන ඇත්තේ ජර්මනියෙන් වන අතර මෙරට තුළදී එන්නත් මාත්‍රා දෙකක මිල රුපියල් එක් ලක්ෂ 30,000 කට ආසන්න වනු ඇති බව වාර්තා වේ.
අප මෙම පුවත මීට පෙර වාර්තා කර තිබුණේ මෙසේය.
කොරෝනා මරණවලින් ජීවිත බේරන තවත් බෙහෙතක් සජිත් ආණ්ඩුවට පෙන්වා දෙයි!
කොරෝනා මරණවලින් ජීවිත බේරා ගත හැකි තවත් බෙහෙත් වර්ග 2ක් විපක්ෂනායක සජිත් ප්‍රේමදාස මහතා විසින් ආණ්ඩුවට දැනුම් දී ඇත.
ට්විටර් පණිවුඩයක් තබමින් විපක්ෂනායකවරයා මේ බව දැනුම් දී තිබේ.
‘ඇමරිකා එක්සත් ජනපදයේ ආහාර හා ඖෂධ පාලන ෆෙඩරල් නියෝජිතායතනය විසින් බරපතල තත්ත්වයක් දක්වා කොවිඩ් රෝග තත්ත්වය වර්ධනය වීමේ අවදානමක් සහිත, සුළු හා සාමාන්‍ය මට්ටමේ රෝග තත්ත්වයන්හි පසුවන කොවිඩ් රෝගීන් වෙනුවෙන් REGEN-COV සන්නාම නාමය යටතේ නිෂ්පාදිත Casirivimab හා Imdevimab යන එ්කක්ලෝනීය ප්‍රතිදේහ හදිසි භාවිතය සඳහා අවසර ලබාදී ඇත. ඇමරිකා එක්සත් ජනපදයේ සිටින මාගේ මිතුරන් මා හට පවසන්නේ රෝගය උත්සන්න වීම වැළැක්වීම මඟින් බොහෝ දෙනෙකුගේ ජීවිත බේරා දුන් ආශ්චර්යමත් ඖෂධයක් ලෙස මෙය සැලකෙන බවයි.එම නිසා ශ්‍රී ලංකා රජය විසින් අදාළ විශේෂඥයින්ගේ අදහස් ලබාගෙන ශ්‍රී ලාංකිකයින්ගේ ජීවිත බේරා ගැනීම සඳහා මෙම ජීවිතාරක්‍ෂක ඖෂධය මිලදී ගැනීමට කටයුතු කිරීම ඥානාන්විත වනු ඇත’ යනුවෙන් එම ට්විටර් පණිවුඩයේ දැක්වේ.
