හෘදයට රුධිරය සපයන නාළවල අවහිරතා මඟහරවාගැනීම සඳහා භාවිත කරන ස්ටේන් (Stent) සම්පූර්ණයෙන්ම රෝගීන්ට නොමිලේ ලබාදීමට සෞඛ්‍ය අමාත්‍යාංශය තීරණය කර තිබේ.
රජයේ රෝහලකදී සිදුකරන සැත්කමකදී පවා ස්ටේන් පිටතින් රැගෙන ඒමට රෝගීන්ට සිදුව තිබෙන අතර,එක් ස්ටේන් එකක් මිලදී ගැනීම සඳහා රෝගීන්ට රුපියල් එක්ලක්ෂ විසි පන්දහසත්, එක්ලක්ෂ පනස් දහසත් අතර මුදලක් වියදම් කිරීමට සිදුව ඇත.
රෝගී ජනතාව පත්ව තිබෙන දුෂ්කරතාව සැලකල්ලට ගනිමින් ස්ටේන් නොමිලේ ලබාදීමට සෞඛ්‍ය අමාත්‍ය දොස්තර රාජිත සේනාරත්න මහතා වැඩපිළිවෙළක් සකස් කර තිබේ.
මෙම වැඩපිළිවෙළ යටතේ ලබන ජනවාරි මාසයේ සිට නොමිලේ ස්ටේන් ලබාදීමට සැලසුම් කර තිබෙන අතර, ඒ හරහා වසරකට රුපියල් බිලියන 1.2කට ආසන්න මුදලක් වෙන් කිරීමටද සැලසුම් කර ඇත.
