“ජනතාවගෙන් අපි ඉල්ලන්නේ තවදුරටත් මේ පාපය ඉවසන්න එපා.මේකට එරෙහිව නැගිටින්න” යනුවෙන් සමඟි ජන බලවේගයේ පාර්ලිමේන්තු මන්ත්‍රී පාඨලී චම්පික රණවක මහතා අවධාරණය කළේය.
ඒ, ඊයේ (28) විශේෂ ජනාධිපති පරීක්ෂණ කොමිසම හමුවේ සාක්ෂි ලබාදීම සඳහා පැමිණි අවස්ථාවේ මාධ්‍ය වෙත අදහස් දක්වමිනි.
මීට එරෙහිව පාඨලී චම්පික රණවක මහතා අභියාචනාධිකරණය හමුවේ නඩුවක්ද ගොනුකර තිබෙනවා.
එලෙස නඩුවක් ගොනුකර ඇති අවස්ථාවක තවත් කොමිසමක් පත් කර ඒ සඳහා සාක්ෂි දීමට පැමිණෙන ලෙස දන්වා තමන්ට දඩුවම් කර, ප්‍රජා අයිතිය අහෝසි කිරීමේ සැලසුමක් ඇති බවටයි පාඨලී චම්පික රණවක මහතා චෝදනා කරන්නේ.
2010 නිදහස් සන්ධාන ආණ්ඩු කාලයේදී සිදු වූ බව කියන දූෂණ වංචා සෙවීම සඳහා යහපාලන ආණ්ඩු සමයේ ක්‍රියාත්මක වූ දූෂණ මර්දන කමිටුව මගින් දේශපාලන පළිගැනීමක් සිදුවූ බවටත් රණවක මහතා එහි සාමාජිකයෙකු බවට චෝදනා ගොනු කිරීම හේතුවෙන් ඔහුව මෙලෙස කැඳවා තිබුණි.
විශේෂයෙන් අද වන විට රට බංකොලොත් වී ඇත්තේ 2010න් පසු සිදුකරන ලද ජාතික මංකොල්ලයක ප්‍රතිඵල හැටියට බව රණවක මන්ත්‍රීවරයා සඳහන් කළේය.
මහා සංවර්ධනයකට මුවාවෙමින් අධිවේගී මාර්ග,විදුලි බලාගාර,ගුවන් තොටුපොළවල් ආදී ව්‍යාපෘති මඟින් දැවැන්ත ලෙස ඩොලර් මංකොල්ලයක් සිදුකර ඇති බවයි මන්ත්‍රීවරයා පැවසුවේ.
ලෝකයේ විවිධ තැන්වලින් දේපල,ජෙට්යානා මතුවෙන්නේ එදා ජනතාවගෙන් කොල්ල කගන්නා ලද ධනයෙන් බව ද හෙතෙම සඳහන් කරයි.
මෙි පිළිබඳව වැඩිදුර අදහස් දැක්වූ චම්පික රණවක මහතා.“අපිව කැඳවලා තියෙන්නේ විශේෂ ජනාධිපති කොමිෂමක් පත් කරලා තිබුණා කලින් උපාලි අබේරත්න මහත්මයාගේ මූලිකත්වයෙන්. ඒකට අපි ඇවිල්ලා සාක්කි දුන්නා. ඒකට පස්සේ මේ තවත් අලුත් කොමිසමක් පත් කරලා තියෙනවා. අපට දඬුවම් දීලා, අපේ ප්‍රජා අයිතිය අහෝසි කිරීමේ පරමාර්ථයෙන්.මම අපේ ජනතාවට කියන්නේ, අද ඔබට විදුලිය නෑ. ඔබේ දරුවන්ට කිරිපිටි නෑ. වැඩකරන ජනතාවට අද ආහාර ටික මිලදී ගන්න හැකියාවක් නෑ. පොහොර නෑ ගොවියට. ඒ වගේම හාල් මිලදී ගන්න විදිහක් නෑ සාමාන්‍ය ජනතාවට. ඒ වගේම ගෑස් නෑ, තෙල් නෑ, විදුලිය නෑ. ඇයි? ඩොලර් නෑ. ඇයි ඩොලර් නැතිවෙලා තියෙන්නේ? දෙදහස් පහ පහළොව කාලයේ විශේෂයෙන්ම දෙදහස් දහයෙන් පස්සේ සිදුකරන ලද ජාතික මංකොල්ලයක ප්‍රතිඵලය හැටියට තමයි.මහා සංවර්ධනයක් පිටිපස්සේ අධිවේගී මාර්ග, විදුලි බලාගාර, ගුවන් තොටුපොළවල් මේ යනාදී මහා සංවර්ධනයකට මුවා වෙලා කරපු දැවැන්ත ඩොලර් මංකොල්ලයක ප්‍රතිඵල හැටියට තමයි අද ලංකාව බංකොලොත් වෙලා තියෙන්නේ. ඒ නිසා ඔබේ දරුවන්ට අද කිරිපිටි නැත්තේ, රෝහලට ගියාම ඖෂධ නැත්තේ, ඒ වගේම සිමෙන්ති ටික නැත්තේ බාසුන්නැහැට. පොහොර ටික නැත්තේ ගොවියට. ඒ වගේම ජනතාවට සහල් ටික ගෙනත් දෙන්න, ආහාර ටික ගෙනත් දෙන්න හැකියාවක් නැති වෙන විදියට ඩොලර් නැති වෙලා තියෙන්නේ. විදුලිය කැපෙන්නේ, තෙල් නැති වෙන්නේ, ගෑස් නැති වෙන්නේ මේ මහා ජාතික ඩොලර් මංකොල්ලය නිසා. මේවා ගැන කතා කරපු වරදට, මේවා පෙන්වා දීපු වරදට, අපිව මේ උසාවි වලට ගෙන එනවා නම්, අපිව මේ වගේ අධිකරණ ඉස්සරහට ගෙනල්ලා කටයුතු කරනවා නම්, මේ ගැනත් අපි ජනතාවට භාර කරනවා.එමෙන්ම මෙම විශේෂ ජනාධිපති කොමිසම ඇත්තෙන්ම විහිළුවක් බවත් සාක්ෂි දීමට පමණක් තමන්ට පැමිණෙන ලෙස පැවසුවත් ඒ සඳහා අත්‍යවශය පුද්ගලයන් මේ සඳහා කැඳවීමක් සිදුකර නොමැති බවට පාඨලී චම්පික රණවක මහතා අනාවරණය කර සිටියේය.“මෙහි තියෙන විහිළුව තමයි, මේ විමර්ශන කටයුතු කරපු පොලිස් ඇමතිවරු කාවවත් මෙතෙන්ට කැඳවලා නැහැ. මේ විමර්ශන කටයුතු කරපු නීතිපති දෙපාර්තමේන්තුව භාරව හිටපු අධිකරණ ඇමතිවරු මෙතනට කැඳවලා නැහැ. කටයුතු කරපු පොලිස් නිලධාරීන්ට එරෙහිවම පොලිස් පොලිසිය විමර්ශනය කරනවා. විමර්ශන කටයුතු උසාවියට ඉදිරිපත් කරපු නීතිපති දෙපාර්තමේන්තුවට විරුද්ධවම නීතිපති දෙපාර්තමේන්තුව වැඩ කරනවා. මේ වගේ ඉතාම විහිළු සහගත තත්වයක් තියෙන්නේ ඇත්තටම.බොහොම පැහැදිලිව අපි ජනතාවගෙන් ඉල්ලනවා. එදා කරන ලද ඒ මහා ජාතික මංකොල්ලය ඩොලර් මංකොල්ලය. ඒ හරහා තමයි ලෝකයේ විවිධ තැන්වල අද දේපල මතුවෙන්නේ. ජෙට් යානා මතුවෙන්නේ. ඒවා ඔබෙන් කොල්ල කාගත්ත ධනය. අද ඔබ දුක් විඳින්නේ ඒ මංකොල්ලයේ ප්‍රතිඵල. ඒ වෙනුවෙන් පෙනී සිටීම නිසා තමයි අද අපිට උසාවි ගෙනිහිල්ලා දඬුවම් කරන්න, ප්‍රජා අයිතිය අහිමි කරන්න කටයුතු කරන්නේ. අපි සතුටින් ඒ සියල්ල විඳ දරා ගන්නවා. ඔබෙන් අපි ඉල්ලන්නේ අපේ ජනතාවගෙන් මේ පාපය තවත් ඉවසන්න එපා. මේකට එරෙහිව නැගිටින්න.” යනුවෙන් චම්පික රණවක මහතා පවසා සිටියේය.එමෙන්ම මේ සඳහා පාඨලී චම්පික රණවක මහතා සමඟ නීතිමය කටයුතු සොයා බැලීම සඳහා පැමිණි නීතිඥ ශ්‍රීලාල් ලක්තිලක මහතාද අදහස් දක්වන ලදී.අද මේ විශේෂ ජනාධිපති කොමිසම ඉදිරියට පාඨලී චම්පික රණවක මහත්මයා කැඳවලා තියෙනවා. ඒ කැඳවීමේ අරමුණ වෙලා තියෙන්නේ යහපාලන ආණ්ඩුව සමයේ රනිල් වික්‍රමසිංහ මහත්මයා විසින් එහෙම නැත්නම් එවකට අගමැති විසින් පත්කර දූෂණ විරෝධී කමිටුවේ සාමාජිකයෙක්ව සිටිම හේතුකොටගෙන ඔහුගේ ප්‍රජා අයිතිය අහෝසි වෙනවද නැද්ද කියලා හොයලා බලන්න. මේක කැබිනට් මණ්ඩලයේ සාමාජිකයෙකුව සිටීම සිටීම හේතුවෙන් සහ අගමැතිවරයා විසින් කැබිනට් පත්‍රිකාවක අනුමැතියෙන් පත්කරන ලද විශේෂ ජනාධිපති දූෂණ විරෝධී කමිටුවේ සාමාජිකයෙක්ව සිටීම නිසා එම කමිටුව විසින් ගන්නා ලද ක්‍රියාමාර්ග වලට චම්පික රණවක මැතිතුමා වගකිව යුතුද නැද්ද කියලා හොයලා බලන්න කියලා තමයි මේ අද ඇවිල්ලා තියෙන්නේ.මීට පෙරාතුව උපාලි අබේරත්න කමිටුව විසින් කැකිල්ලේ නඩු තීන්දු ගණනාවක් දීලා තිබුණා. උපාලි අබේරත්න කොමිෂන් පදනමින් තමයි ඉස්සෙල්ලා ජනාධිපතිතුමා මේ විශේෂ ජනාධිපති කොමිසම පත් කරේ. දැන් කියනවා ඒ උපාලි අබේරත්න කොමිසමේ නිර්දේශ මත නෙවෙයි ඊට වඩා ස්වාධීනව තමයි මේක සොයා බලන්නේ කියලා.එහෙනම් අපිට තියෙන ප්‍රශ්නය තමයි මේ විශේෂ ජනාධිපති කොමිසමට හොයා බලන්න දෙයක් නෑ. මේ කියන්නේ දේශපාලන පලිගැනීම් කරලා තියෙන කියලා. නමුත් ඒ ඔක්කොටම වැඩිය විශාල දේශපාලන පලිගැනීම් සිදුවෙන්නේ මේ අවස්ථාවේ. ගිය ආණ්ඩුවේ හිටපු ප්‍රගතිශීලි ඇමතිවරු. වෙනත් ඇමතිවරු කැඳවන්නේ නැහැ. මේකට කැඳවන්නේ අනුර කුමාර දිසානායක මහත්තයා. සරත් ෆොන්සේකා මහත්මයා, චම්පික රණවක මහත්මයා. ඒ අය ඉලක්ක කරලා කරන්නේ ඊළඟ ජනාධිපතිවරණයට අභියෝගයක් විය හැකි පුද්ගලයෝ තෝරලා අරගෙන, ඔවුන්ට දඬුවම් කරන්නට, ඔවුන්ගේ සිවිල් අරමුණු කරගෙන තමයි මේ කරන්නේ. ඉතින් මේක විගඩමක්. මේ විග අපි ආණ්ඩුවට කියනවා කරුණාකරලා ජනාධිපතිවරයාට කියනවා මේ විගඩම වහාම නවත්තන්න කියලා.” යනුවෙන් මන්ත්‍රීවරයා පැවසීය.
