සුඛෝපභෝගී රථ වාහන සඳහා රජය නව බද්දක් පනවා ඇති බව ලංකා වාහන ආනයනකරුවන්ගේ සංගමය පවසයි.
එහි සභාපති ඉන්දික සම්පත් මෙරින්චිගේ පවසන්නේ රජය කුඩා වාහන වල බදු අඩුකර ඇති බවට වැරදි ප්‍රචාරයක් සිදුකරමින් සිටින බවයි.
2019 අයවැය යෝජනා යටතේ පැනවූ සුඛෝපභෝගී රථ වාහන බද්ද කුඩා වාහනවලට බලනොපැවෙත්වෙන බව මුදල් අමාත්‍යාංශය නිවේදනයක් නිකුත් කරමින් පසුගිය 29 වැනිදා ප්‍රකාශ කළේය.
එහි දැක්වෙන්නේ සුඛෝපභෝගී මෝටර් කාර් සහ ජීප් රථ පමණක් එම බදුවලට යටත්වන අතර, කුඩා මෝටර් රථ කිසිවකටත් එය අදාළ නොවන බවයි.
එමෙන්ම, වෑන් රථ, තනි කැබ් රථ, ද්විත්ව කැබ් රථ(ඩබල් කැබ්), මෝටර් සයිකල් සහ මෝටර් ට්‍රයිසිකල් යනාදී වාහනද මෙම සුඛෝපභෝගී බද්දට යටත් නොවන බවද මුදල් අමාත්‍යාංශය ප්‍රකාශ කළේය.
තව ද, කුඩා ප්‍රමාණයේ වාහනවලට මෙම සුඛෝපභෝගී බදු අයනොකරන බව අවධාරණය කරන අතර ඒ අතරට Toyota Vitz, Suzuki Every, Toyota Roomy, Suzuki Alto, Suzuki Baleno, Daihatsu Petrol, Honda Grace, Suzuki Wegon R, Toyota Aqua යන මාදිලිවල වාහන මෙම සුඛෝපභෝගී බද්දට අදාළ නොවන බවයි මුදල් අමාත්‍යාංශය සඳහන් කරන්නේ.
තව ද Axio, Premio සහ Allion යන මාදිලිවල සාමාන්‍ය වාහන ද මෙම සුඛෝපභෝගී බද්දට යටත් වන්නේ නැහැ.
කෙසේවෙතත් ලංකා වාහන ආනයනකරුවන්ගේ සංගමය පවසන්නේ රජය සුඛෝපභොග් රථවලට නව බද්දක් පනවා ඊට කුඩා වාහන අයත් නොවන බවට නිවේදනය කර ඇති බවයි.
