මිලේනියම් චැලෙන්ජ් කෝපරේෂන් අධ්‍යක්ෂ මණ්ඩලයේ තීරණය සම්බන්ධයෙන් කොළඹ ඇමරිකා එක්සත් ජනපද තානාපති කාර්යාලය ප්‍රවෘත්ති නිවේදනයක් නිකුත් කර ඇත. එම නිවේදනය පහතින් දැක්වේ.
2020 දෙසැම්බර් 17 වැනි දින, කොළඹ දී – හවුල්කාර රටේ සම්බන්ධවීම අඩුබව හේතුකොටගෙන, ශ්‍රී ලංකාවට ලබාදීම සඳහා යෝජනා වී තිබුණු රු. බිලියන 89ක MCC සංවර්ධන ආධාර ප්‍රදානය නැවැත්වීමට මිලේනියම් චැලෙන්ජ් කෝපරේෂන් (MCC) අධ්‍යක්ෂ මණ්ඩලය දෙසැම්බර් 15 වැනි දින තීරණය කරන ලදී. ශ්‍රී ලංකාව සඳහා අනුමතව තිබූ එම රු. බිලියන 89ක මුදල, තමන්ගේ සංවර්ධන ප්‍රමුඛතා හඹා යාමට, දුගී බව අඩුකරගැනීමට සහ තම ආර්ථික වර්ධනය කරගැනීමට මුදල් ප්‍රදාන අවශ්‍ය කර තිබෙන, සුදුසුකම් සහිත වෙනත් රටවල්වලට ලබාගත හැකිවනු ඇත.
අදාළ රට පිළිබිඹි කරන හිමිකාරත්වය, විනිවිදභාවය සහ ප්‍රදානයේ ප්‍රතිඵල සඳහා වගවීම යන කරුණු MCC හි සංවර්ධන ආකෘතිය තුළ ඉතාමත් වැදගත් වේ. එකතුව ඩොලර් බිලියන 13.5කට ආසන්න මුදල් ප්‍රමාණයක් සඳහා ලොව වටා රටවල් 30කට ආසන්න ප්‍රමාණයක සමඟින් MCC විසින් සාර්ථක ප්‍රදාන ගිවිසුම් 38ක් ඇතිකරගෙන තිබේ. ප්‍රාදේශීය සහ දේශීය ආයෝජනය සඳහා හේතුකාරක වෙමින්, මෙම ප්‍රදාන ඔස්සේ පුද්ගලයින් මිලියන ගණනක් දුගීබවින් ඉහළට ඔසවා තබා ඇත.
එක්සත් ජනපදය ශ්‍රී ලංකාවේ මිතුරකු සහ හවුල්කරුවකු ලෙස කටයුතු කරන අතර කෝවිඩ් සඳහා ප්‍රතිචාර දැක්වීමේ දී සහ ස්වකීය ආර්ථිකය ගොඩනංවා ගැනීමේ දී ඉදිරියටත් අඛණ්ඩව ශ්‍රී ලංකාවට සහාය ලබා දෙනු ඇත.
