අක්කර 37 ක වටිනා තෙත් බිම් ඇතුළු පරිසර පද්ධතිය මෙන්ම වේරැස් ගඟ හරස් කරමින් දිනෙන් දින අහස උසට යන කරදියානු කුණු කන්දට එරෙහිව පසුගියදා ජනතාව පාරට බැස දැඩි විරෝධතාවක් දැක්වීය. බ්ලූමැන්ඩල්, මීතොටමුල්ල මෙන්ම දිනෙන් දින ජනතාවට නිදහසේ හුස්ම ගැනීමේ අයිතිය අහිමිකරන කුණු කන්ද ව්‍යාප්ත කිරීම වහාම නතරකර හැකි ඉක්මණින් විසඳුම් ලබාදෙන ලෙස ජනතාව රජයට සහ පරිසර බලධාරීන්ට මෙහිදී බලකර සිටියහ.
එම විරෝධතාවය පසුගිය 9 වැනිදා පිළියන්දල,බෝකුන්දර ප්‍රදේශයේදී පැවැත්විණි.මේ සදහා පූජනීය මහා සංඝරත්නය නියෝජනය කරමින් රාජකීය පණ්ඩිත තුම්බෝවිල ධම්මරතන හිමි,රාජකීය පණ්ඩිත මංගලපුර පියරතන හිමි වැඩම කල අතර වේරහැර,තුම්බෝවිල,බෝකුන්දර,කරදියාන සහ බොරලැස්ගමුව යන ගම්මානවල අගතියට පත් ජනතාව සහ පරිසරවේදින් විශාල පිරිසක් සම්බන්ධවිය.
“පරිසර ජයග්‍රහණ ජාතික ව්‍යාපාරයේ“ සංවිධානයෙන් පැවති මෙම උද්ඝෝෂණයෙන් අනතුරුව මාධ්‍යවෙත අදහස් දැක්වූ ජනතාව කියා සිටියේ මෙම ප්‍රශ්නයට වහා විසඳුම් ලබා නොදුනහොත් මින් එහා ගිය පියවරක් ගැනීමට ජනතාව සූදානම් බවත්, ප්‍රදේශ ගණනාවක ජනතාව පීඩා විඳින මේ කුණු කන්ද නිසා දැවැන්ත පරිසර සහ සෞඛ්‍ය ප්‍රශ්න ගණනාවක්ම නිර්මාණය වී ඇති බවයි.
ඡායාරූප – තාරක රණවීර
