මෙරට පාස්කු ඉරිදා ප්‍රහාරයේ ත්‍රස්තවාදීන්ට නොදැනුවත්කමින් මුදල් සපයා උදව් කර ඇති බව කියන පුද්ගලයෙකුට නවසීලන්තයේ සරණාගතභාවය හිමි වි ඇතැයි විදෙස් වාර්තා පවසයි.
මෙම පුද්ගලයා ත්‍රස්තවාදයට සහය දැක්වීමේ අරමුණින් මුල්‍ය සහය දක්වා නැති අතර මුදල් ලබාගත්තේ කවුද මුදල් ලැබුණේ කොහෙන්ද යන වග නොදන්නා මුදල් හුවමාරු කරන කුරියර්කරුවකු ලෙස කටයුතු කර ඇතැයි එරට ආගමන හා ආරක්‍ෂක අධිකරණය තහවුරු කරගත් බැවින් මෙම පියවර ගෙන ඇතැයි එරට වාර්තා පවසයි.
ඔහුගේ නැන්දම්මා සහ විදේශීය තැරැව්කරුවකු සම්බන්ධ මුදල් හුවමාරු ක්‍රමයක් තුළ ඔහු මසකට ගනුදෙනු කිහිපයක් සිදු කර ඇති බව එහි දැක්වේ.
2019 දී මෙරට සිදු වූ පාස්කු බෝම්බ ප්‍රහාරයෙන් පසු ඔහුගේ දෙමළ ජාතික බිරිඳ අත්අඩංගුවට ගෙන තිබේ. ඇයව නිදහස් කර ඇති අතර යුවළ සැඟවී සිට පසුව ව්‍යාජ විදේශ ගමන් බලපත්‍ර මත ඔවුන් නවසීලන්තයට පියාසර කර ඇත. එහිදී අභියාචනයක් මත ජුනි මාසයේදී ඔවුන්ට සරණාගතභාවය හිමි වී ඇතැයි එරට වාර්තාවල දැක්වේ.
විනිශ්චය මණ්ඩලය ඔවුන්ගේ සාක්ෂි ‘විශ්වසනීය, ස්ථාවර හා බලවත්’ යැයි තීන්දු කර ඇත.
පාස්කු 2019 ත්‍රස්ත ප්‍රහාරයට සම්බන්ධ පුද්ගලයින් සම්බන්ධව බලධාරීන් විශ්වාස කරන මුදල් හුවමාරු ක්‍රමයක් සමඟ සැමියා සම්බන්ධ වී සිටින නිසා බිරිඳ සහ සැමියා යන දෙදෙනාම ශ්‍රී ලංකා බලධාරීන්ගේ අතින් අනතුරට ලක්වීමට බිය වන බව එම වාර්තාව වැඩිදුරටත් පවසා ඇත.
ඔහු සම්බන්ධ වූ මුදල් හුවමාරු ව්‍යාපාරය පිළිබඳව මෙම පුද්ගලයාගේ නොදැන සිටීම මෙහිදී ‘මූලික’ කරුණ වූ බව එහි සඳහන් විය. ඔහු තැරැව්කරුවෙකු නොව, කොළඹ තැරැව්කරුවන්ගෙන් මුදල් ලබාගෙන එය බැංකුවල තැන්පත් කළ කුරියර්වරයෙකු වූ අතර, විදේශීය තැරැව්කරුවකු විසින් ඔහුගේ නැන්දම්මා හරහා ඔහුට ලබා දුන් ගිණුම් විස්තර සමඟ ඔහු සම්බන්ධ වී තිබේ.
එය වසරකට ආසන්න කාලයක් පැවති අතුරු ව්‍යාපාරයක් වූ නමුත් බලධාරීන් ඔහුව ද්‍රෝහියෙකු ලෙස දුටු බව ඔහු අධිකරණයට පවසා ඇත.
සැමියා සිංහල අයකු බවත් විදේශික තැරැව්කරු බව කියන පුද්ගලයා ලාංකික මුස්ලිම්වරයෙකු වූ අතර බිරිඳගේ සහෝදරිය මුස්ලිම් ජාතිකයෙකු සමඟ විවාහ වී සිටී.
කාන්තාවගේ සැමියා සිතන්නේ ඔහු මුදල් තැන්පත් කළ සමහර ගිණුම් කෙසේ හෝ ප්‍රහාරයන්ට සම්බන්ධ පුද්ගලයින් සමඟ සම්බන්ධ වී තිබීමට ඉඩ ඇති බවය.
නමුත් මේ ගැන ඔහුට කිසිදු අදහසක් නැති බවත් ප්‍රහාරයට සම්බන්ධ කිසිවෙකු සමඟ සබඳතාවක් ඇති බව හෝ ඔහු දන්නේ නැති බව ද එම වාර්තාවේ වැඩිදුරටත් සඳහන් ය.
