පාර්ලිමේන්තු සංකීර්ණයේ ආරක්ෂාව අයවැය කාලයේදී වැඩි කිරීමට පාර්ලිමේන්තු ප්‍රධානීන් තීරණය කර ඇත.
පාර්ලිමේන්තු සංකීර්ණයේ ආරක්ෂාව සහ සෞඛ්‍ය ආරක්ෂාව වෙනුවෙන් විශේෂ වැඩපිළිවෙළක් අයවැය කාලයේදී එහි ක්‍රියාත්මක කරන බව වේත්‍රධාරී නරේන්ද්‍ර ප්‍රනාන්දු මහතා පැවැසීය.
මේ අනුව පාර්ලිමේන්තුවට පැමිණෙන පිරිස් අහඹු ක්ෂණික ප්‍රතිදේහ ජනක පරීක්ෂණවලට( රැපිඩ් ඇන්ටිජන්) ලබන 8 වැනිදා යොමු කෙරෙන බවද හෙතෙම සඳහන් කළේය.
පාර්ලිමේන්තු මහ ලේකම් කාර්ය මණ්ඩලයේ සාමාජිකයෝද ,අනෙකුත් අනුබද්ධ කාර්ය මණ්ඩලවල සාමාජිකයෝද , පාර්ලිමේන්තු ජනමාධ්‍යවේදීහු සහ ආරක්ෂක අංශවල නිලධාරීහුද රැපිඩ් ඇන්ටිජන් පරීක්ෂණවලට මෙලෙස යොමු කෙරෙති.
මෙම පරීක්ෂණ පාර්ලිමේන්තු සංකීර්ණයේදී ලබන 8 වැනිදා උදේ 9.00සිට දහවල් 12 දක්වා පැවැත්වීමට නියමිතය.
සෞඛ්‍ය අංශ ප්‍රධානීන්ගේ උපදෙස් අනුව මෙම පරීක්ෂණ වටය ක්‍රියාත්මක කෙරෙන බව නරේන්ද්‍ර ප්‍රනාන්දු මහතා වැඩිදුරටත් කීවේය.
පාර්ලිමේන්තු රැස්වීම් ලබන 8 වැනිදා සදුදා සිට දෙසැම්බර් මස 10 වැනිදා දක්වා නොකඩවාම (ඉරිදා දින හැර) පැවැත්වේ.
මුදල් ඇමැතිවරයා අයවැය යෝජනාවලිය ලබන 12වැනිදා පාර්ලිමේන්තුවට ඉදිරිපත් කරන අතර එදින සිට දෙසැම්බර් මස 10 වැනිදා දක්වා අයවැය පිළිබඳ විවාද පැවැත්වෙනු ඇත . අයවැය යෝජනාවලිය පිළිබඳ අවසාන ඡන්ද විමසීම පැවැත්වීමට නියමිතව ඇත්තේ දෙසැම්බර් මස 10වැනිදාය.
