එක්සත් ජාතීන්ගේ සංවිධානය විසින් සමස්ථ ලෝකයේ ස්වේච්ඡා සේවය හා එයට සිදුකළ හැකි සාධනීය සමාජ බලපෑම වෙනුවෙන් පිරිනැමෙන UNV 50 AWARDS සම්මානය රාජ්‍ය අංශය වෙනුවෙන් ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍යාංශය වෙත පිරිනමා තිබේ.
ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍යාංශය වෙනුවෙන් එහි ලේකම් මහාචාර්ය රංජිත් දිසානායක මහතා වෙත Galle Face Hotel හිදී පසුගියදා එම සම්මානය පිරිනමනු ලැබීය.
ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍යාංශය විසින් ලංකාව පුරා සිදු කරන ලබන සංවර්ධන ව්‍යාපෘති හා එමගින් ග්‍රාමීය ජනතාවට ලැබෙන ප්‍රතිලාභ ඉහළ මට්ටමක පැවතීම හේතුවෙන් එක්සත් ජාතීන්ගේ සංවිධානයේ ඇගයීමට ලක් වී ඇත.
මාර්ග ප්‍රතිසංස්කරණය හා වැඩිදියුණු කිරීම, ග්‍රාමීය පාලම් ඉදිකිරීම හා වැඩිදියුණු කිරීම, රුක් රෝපණ ව්‍යාපෘතිය, “මග දෙපස තුරු සෙවණ” ජංගම යෙදුම, පාලම් නිර්මාණ තරඟය යන අංශවල දක්වා ඇති දායකත්වය මෙහිදී ඇගයීමට ලක් වී තිබේ. ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍ය නිමල් ලාන්සා මහතාගේ මග පෙන්වීම යටතේ අමාත්‍යාංශයේ මෙම වැඩපිළිවෙළ ක්‍රියාත්මක වේ.
ජාතික මහාමාර්ග පද්ධතිය භාවිතා කරමින් රට පුරා කෘෂිකාර්මික සහ අනෙකුත් නිෂ්පාදන ප්‍රවාහනය සඳහා ඉහළ මට්ටමේ ප්‍රවේශයක් ලබා දෙමින්, දීප ව්‍යාප්ත ග්‍රාමීය ප්‍රදේශවල මාර්ග ප්‍රතිංස්සරණය හා වැඩිදියුණු කිරීම සිදු කරනු ලැබේ. මෙම ව්‍යාපෘතිය දැනට ශ්‍රී ලංකාවේ ග්‍රාම නිලධාරී වසම් 14,022 හි ක්‍රියාත්මක වේ.
ජාතික මහාමාර්ග පද්ධතිය භාවිතා කරමින් රට පුරා කෘෂිකාර්මික සහ අනෙකුත් නිෂ්පාදන ප්‍රවාහනය සඳහා ඉහළ මට්ටමේ ප්‍රවේශයක් ලබා දෙන ග්‍රාමීය ගම්මාන සම්බන්ධ කර ග්‍රාමීය ප්‍රදේශවල සම්බන්ධතාවය වැඩිදියුණු කිරීමට අපේක්ෂිතය. එමෙන්ම ජනතාවගේ දෛනික කටයුතු පහසු කරලීමට වසර 4 ක් තුළ පාලම් 5,000 ක් ඉදි කිරීමේ ඉලක්කය සපුරාලීමට නියමිතය.
සංවර්ධන සැලසුම් ක්‍රියාත්මක කිරීමේදී පරිසරය ආරක්‍ෂා කර ගැනීම අපේක්‍ෂාවයි. ඒ අනුව අමාත්‍යාංශය විසින් සිදු කරනු ලබන සංවර්ධන වැඩසටහන් ක්‍රියාත්මක කිරීමේදී පැළ මිලියන 2 ක් සිටුවීමේ වැඩසටහන ක්‍රියාත්මක කර ඇත. 2025 වන විට මාර්ග දෙපස සහ පොදු ස්ථානවල පැළ මිලියන 2කට අධික ප්‍රමාණයක් සිටුවීමේ ඉලක්කය පෙරදැරිව කටයුතු කරනු ලැබේ. එමෙන්ම මෙහි සාර්ථකත්වය උදෙසා “මග දෙපස තුරු සෙවණ සුරැකුමට පරිසරය” තේමාව යටතේ ජංගම යෙදුමක් ද හදුන්වා දී ඇත.
ග්‍රාමීය පාලම් වැඩසටහන ක්‍රියාත්මක කිරීමේදී සියලු පාර්ශ්වකරුවන්ට දැනුම හුවමාරු කර ගැනීමට සහ වැඩසටහනේ තාක්ෂණික අභියෝග සාකච්ඡා කිරීමට වේදිකාවක් සකස් කර දී තිබේ. එමගින් පාර්ශවකරුවන්ගේ තාක්ෂණික ධාරිතාව ඉහළ නැංවීම අපේක්ෂා කෙරේ. සම්පත් දායකයින් ඉදිකිරීම් ක්‍රියාවලියේ මූලික කරුණු සහ අනෙකුත් තාක්ෂණික අභියෝග පිළිබඳ දැනුම බෙදාගෙන ඇත.
ග්‍රාමීය මාර්ග හා අවශේෂ යටිතල පහසුකම් රාජ්‍ය අමාත්‍යාංශය විසින් ක්‍රියාත්මක කරනු ලබන ඉහත වැඩසටහන් මගින් සිදු කර ඇති මෙහෙය ඇගයීම වෙනුවෙන් මෙම සම්මානය පිරිනමා තිබේ.
