Swift ජාත්‍යන්තර බැංකු ගෙවීම් පද්ධතියට රුසියාවේ ප්‍රවේශය අවහිර කිරීමට බටහිර රටවල් රැසක් එකඟ වී තිබෙනවා.
ප්‍රංශය, ජර්මනිය, ඉතාලිය, බ්‍රිතාන්‍යය, කැනඩාව, එක්සත් ජනපදය මෙන්ම අලුතින් යුරෝපීය කොමිසමේ නායකයින්, රුසියාවේ ක්‍රියාත්මක බැංකු SWIFT ගෙවීම් පද්ධතියෙන් විසන්ධි කිරීම සිදු කර තිබේ.
එමගින් රුසියාව මූල්‍යමය වශයෙන් හුදකලා කර අඩපන කිරීම බටහිර මිත්‍ර රටවල බලාපොරොත්තුව වේ.
අන් රටවලට අනවශ්‍ය අතපෙවීමේ දඩුවමක් ලෙස පනවන සම්බාධකවලින් එකක් ලෙස එය ක්‍රියාත්මක කර ඇත.
ධනවත් රුසියානුවන්ට “රන් ගමන් බලපත්‍ර” විකිණීම තහනම් කිරීමද ඇතුළු තවත් බලවත් නව ආර්ථික සම්බාධක මාලාවක් ප්‍රකාශයට පත් කර ඇත.
යුරෝපීය කොමිසමේ වෙබ් අඩවියේ ප්‍රකාශයට පත් කරන ලද ඒකාබද්ධ ප්‍රකාශයක මෙය සඳහන් වේ,
“රුසියානු හමුදා Kyiv සහ අනෙකුත් යුක්රේන නගරවලට ඔවුන්ගේ ප්‍රහාර දියත් කරන විට, රුසියාව ජාත්‍යන්තර මූල්‍ය පද්ධතියෙන් සහ අපගේ ආර්ථිකයන්ගෙන් තවදුරටත් හුදකලා කර අධික වියදම් රුසියාව මත පැටවීමට අපි අදිටන් කරගෙන සිටිමු. ඉදිරි දිනවලදී අපි මෙම පියවර ක්‍රියාත්මක කරන්නෙමු.”
සමහර රුසියානු බැංකු SWIFT පණිවිඩ පද්ධතියෙන් බැහැර කිරීම මගින් මෙම බැංකු ජාත්‍යන්තර මූල්‍ය පද්ධතියෙන් විසන්ධි වන්නාසේම ගෝලීය වශයෙන් ක්‍රියාත්මක වීමට ඇති හැකියාවට හානි කරයි.
සම්බාධකවල බලපෑම අනුව රුසියානු මහ බැංකුවට එහි ජාත්‍යන්තර සංචිත භාවිතා කිරීමට ඉඩ නොදෙන සීමාකාරී ක්‍රියාමාර්ග ගන්නට සිදුවේ.
සම්බාධකවලට යටත්ව සිටින අයගේ සහ ඔවුන්ගේ අධිකරණ බල ප්‍රදේශය තුළ ඇති සමාගම්වල වත්කම් හඳුනාගෙන ඒවා කැටි කිරීම මගින් මූල්‍ය සම්බාධක ඵලදායී ලෙස ක්‍රියාත්මක කිරීම සහතික කිරීම සඳහා අත්ලාන්තික් සාගරයේ කාර්ය සාධක බලකායක් මේ සතියේ පිහිටුවන්නටද නියමිතය.
“මෙම අඳුරු පැයේදී අපි යුක්රේන ජනතාවට සහාය දෙමු. අද අපි ප්‍රකාශයට පත් කරන ක්‍රියාමාර්ගවලට අමතරව, යුක්රේනයට එල්ල කළ ප්‍රහාරය සම්බන්ධයෙන් රුසියාව යුක්තිය ඉදිරියට ගෙන ඒම සඳහා අමතර ක්‍රියාමාර්ග ගැනීමට අපි සූදානම් ,” ප්‍රකාශයේ සඳහන් වේ.
මේ අතර රුසියානු ප්‍රහාරවලින් කාකීව් හි ගෑස් නල මාර්ගයක් ගිනිගෙන ඇති බව වාර්තා වන අතර, යුක්රේන අගනුවරට නිරිත දෙසින් පිහිටි වැසල්කිව් හි තෙල් පර්යන්තයක් ද රුසියානු ප්‍රහාරවල ඉලක්කය වී ඇති බව ද වාර්තා වනවා.
එයින් පාරිසරික ව්‍යසනයක් ඇති කළ හැකි බවට අනතුරු අඟවා තිබෙනවා.
තෙල් පර්යන්තයේ පිපිරීම් හේතුවෙන් ඇති වී තිබෙන ගිනි ජාලාවෙන් නික්මෙන දුමාරය අනතුරුදායක විය හැකි බවට යුක්රේන බලධාරීන් අගනුවර වැසියන්ට අනතුරු අඟවා ඇති බවයි වාර්තා වන්නේ.
ඒ අවට ජීවත්වන ජනතාවට දැනුම් දී ඇත්තේ මේ හේතුවෙන් සෞඛ්‍ය ගැටළු ඇතිවිය හැකි බැවින් නිවෙස් තුළට වී දොරවල් ජනෙල් වසාගෙන ආරක්ෂිතව සිටින ලෙසටයි.
රුසියානු හමුදා විසින් මෙලෙස බලශක්ති ප්‍රවාහන මාර්ගයන්ට සහ බලශක්ති ප්‍රභවයන්ට සිදුකරනු ලබන හානි Swift ජාත්‍යන්තර බැංකු ගෙවීම් පද්ධතියට රුසියාවේ ප්‍රවේශය අවහිර කිරීමට ප්‍රධාන හේතු වී ඇති බවයි විදෙස් මාධ්‍ය වාර්තා කර තිබුණේ.
යුක්රේනය ආක්‍රමණය කලහොත් රුසියාව SWIFT ගෙවීම් පද්ධතියෙන් ඉවත් කරන බවට මුල සිටම ඇමරිකාව සහ බ්‍රිතාන්‍යය රුසියාවට අණතුරු ඇඟවූවද ඒ සදහා ඊයේ වන තුරු ජර්මනිය ඇතුළු රටවල් කිහිපයක එකඟතාව පලව නොතිබිනි. ඒ SWIFT පද්ධතියෙන් රුසියාව ඉවත් කලහොත් රුසියාව සමඟ ගණුදෙනු කරන අනෙක් රටවලටද එහි බලපෑමට ලක්වන බැවිනි. කෙසේ වෙතත් අවසාන විසඳුම ලෙස සියළු රටවල එකඟතාවයෙන් රුසියාව SWIFT ගෙවීම් පද්ධතියෙන් ඉවත් කිරීමට මෙලෙස තීරණය කර ඇත.
SWIFT ගෙවීම් පද්ධතිය යනු රටවල් අතර වේගවත් ගෙවීම් සඳහා පහසුකම් සපයන ආරක්ෂිත පණිවිඩ පද්ධතියක් වන අතර ජාත්‍යන්තර වෙළඳාමට මූල්‍යකරණය කිරීමේ ප්‍රධාන යාන්ත්‍රණය වේ. එය 1973 දී බෙල්ජියමේදී නිර්මාණය කරන ලදී. රටවල් 200කට වැඩි ප්‍රමාණයක බැංකු සහ ආයතන 11,000කට වැඩි ප්‍රමාණයක් SWIFT පද්ධතියට සම්බන්ධ වී ඇත. SWIFT පද්ධතියේ නිල වෙබ් අඩවියට අනුව, සෑම දිනකම පණිවිඩ මිලියන 40කට වැඩි ප්‍රමාණයක් යවන අතර, එම කාලය තුළ රජයන් සහ මුල්‍ය ආයතන අතර ඩොලර් ට්‍රිලියන ගනනක් ගණුදෙණු සිදු වේ.
SWIFT වෙතින් රුසියානු බැංකු ඉවත් කිරීම දැඩි ක්‍රියාමාර්ගයක් ලෙස සලකුණු ලබන්නේ ලොව පුරා සියළුම බැංකු ගෙවීම් සඳහා SWIFT ක්‍රමය භාවිතා කිරීම හේතුවනි. රුසියාව සිය ප්‍රධාන අපනයනයන් වන තෙල් සහ ගෑස් සඳහා SWIFT පද්ධතිය මත දැඩි පෙස රඳා පවතී. SWIFT හී ගෝලීය ගණුදෙනු වලින් 1.5% ප්‍රමාණයක් රුසියාවට සම්බන්ධ ගණුදෙනු වේ.
කෙසේ වෙතත් රුසියාව සතුව තමන්ගේම ගෙවීම් පද්ධතියක් ඇති අතර එය SWIFT තරම් ආරක්ෂිත හා දියුණු ක්‍රමයක් නොවේ. ඒ අතර චීනය වැනි සම්බාධක බල නොපාන රටවල් හරහාද රුසියාවට ගණුදෙනු කල හැකි වන නිසා මෙම සම්බාධක කොතරම් දුරට පලදායී වේදැයි තවමත් නිශ්චිත නැත. රුසියාව ගෙවීමි පද්ධතියෙන් ඉවත් කිරීම හේතුවෙන් රුසියාව සමඟ මහා පරිමාණ විදේශ ගණුදෙනු වල නිරත වන ශ්‍රි ලංකාවටද දුෂ්කරතා වලට මුහුණ දීමට සිදුවනු ඇත.
