විද්‍යානුකූල පාරිසරික ඇගැයීම් වාර්තාවක් අනුව ඉදිකරන බස්නාහිර පළාත් ගුවන් හා සමුද්‍ර සංවර්ධන නගරය (Port City) මඟින් රැකියා අවස්ථා ලක්ෂ 2ක් පමණ උත්පාදනය වන බවත් නව කර්මාන්ත හා නවෝත්පාදන අවස්ථා දහස් ගණනක් බිහි වන බවත් බස්නාහිර පළාත් සංවර්ධන හා මහ නගර සංවර්ධන අමාත්‍යාංශයේ ලේකම් ඉංජිනේරු නිහාල් රූපසිංහ මහතා පවසයි.
කොළඹ වරාය නගරය ඉදිකිරීමට කටයුතු කිරීම මඟින් මහමුහුදේ මාළුවල අඩුවීමක් සිදු නොවන බවත් ලේකම්වරයා පවසයි.
එහි ඉදිවන වරාය නගරය ඇතුළත තේ, මැණික් හා ඛනිජ ද්‍රව්‍ය සඳහා වාණිජ කේන්ද්‍ර ඉදි කරන බවත්, බෝට්ටු නිෂ්පාදන කර්මාන්ත හා සමුද්‍ර සංචාරක කටයුතු ප්‍රවර්ධනය කරන බවත් ලේකම්වරයා පවසයි.
ෙම් නගරය ආසියාවේ විශිෂ්ටතම වෙළෙඳ මධ්‍යස්ථානය ලෙස සංවර්ධනය වන බවත් ඔහු කීය. මීට අමතරව මේ හා ඒකාබද්ධව කටුනායක අධිවේගි මාර්ගයේ දිගුවක් ලෙස කැලණි ගඟ හරහා පිහිටි මෝදර පාලම ඔස්ෙස් වරාය වෙත නව අධිවේගී මාර්ගයක් ද ඉදිවන බවත් වරාය නගරය, අභිලාෂය, උරුමය, විනෝදාස්වාදය හා සොඳුරු වාසය යන අරමුණු ඔස්සේ සංවර්ධනය කරන බවත් ලේකම්වරයා පවසයි.
මේ සමුද්‍රිය නගරයේ දීප්තිමත්ම කලාපය ලෙස වරාය නගරය ඉදි වේ. ලෝක සම්මතයන්ට අනුකූලව දේශීය සන්දර්භයට ද ගැළපෙන සේ ඉදිවන මේ වරාය නගරයේ ශ්‍රී ලංකාවේ වඩාත්ම අපේක්ෂා සහගත ව්‍යාපෘතිය වනු ඇත.
වරාය නගරය මඟින් ප්‍රදේශයේ සහ පරිසරයේ ඇති අගය අනුව වෙළෙඳාම, පදිංචිය හා විවේකය සඳහා ආදර්ශ ප්‍රජාවක් මෙහි පදිංචි කරවනු ලැබේ. එමෙන්ම මේ වරාය නගරයට අනුබද්ධව කොළඹ වරාය හා බහාලුම් නගරය ද ස්ථාපිත කෙරෙන බව අමාත්‍යාංශ ලේකම් ඉංජිනේරු නිහාල් රූපසිංහ මහතා පැවැසීය.
