පවතින ඉන්ධන සහ ගෑස් අර්බුදය විසඳීමේ වැඩපිළිවෙළක් ආණ්ඩුව වහාම ඉදිරිපත් කළ යුතු බව ආණ්ඩුවේ පසුපෙල මන්ත්රී කණ්ඩායම ඉල්ලීමක් කරයි.ජනතාව මුහුණ දී ඇති අර්බුදය හමුවේ පාරට බහින්න නොහැකි තත්වයක් තමනට ද උදා වී ඇතැයි ශ්රී ලංකා පොදුජන පෙරමුණේ පාර්ලිමේන්තු මන්ත්රී ප්රමිත බණ්ඩාර තෙන්නකෝන් මහතා සඳහන් කළේය.අර්බුදය විසඳන්න වැඩපිළිවෙළක් ආණ්ඩුව රටට ඉදිරිපත් කළ යුතු බවත් හොඳ දේට හොඳයි කීම සහ වැරදි දේය වැරදියි කීම කණ්ඩායමේ ප්රතිපත්තිය බවත් කී ඔහු එසේ නැතිව පසු පෙල සිටින්නේ ආණ්ඩුවට ප්රසස්ති කීමට නො වන බව ද පැවසීය.
ඉන්ධන හා ගෑස් අර්බුදය හමුවේ ජන ජීවිතය බරපතළ ලෙස කඩා වැටී ඇති බවත් එනිසා ජනතාවගෙන් එල්ලවන අපවාදයෙන් බේරීමට ආණ්ඩුවට හැකියාවක් නැතැයිද ඔහු කියා සිටියේය.
මේ අතර ශ්රී ලංකා පොදුජන පෙරමුණේ පාර්ලිමේන්තු මන්ත්රී ලලිත් එල්ලාවල මහතා සඳහන් කරන්නේ රට අනිවාර්යෙන්ම හදනවා යැයි ජනාධිපතිවරයා ජාතිය අමතා පැවසුවත් ජනතාව තවදුරටත් එතුමා කෙරෙහි විශ්වාසය තබයි ද යන්න ගැටළුවක් බවයි.
ජනතාව පෝලිම්වල දැඩි පීඩාවකින් සිටින බවත් ජනතාවට තවදුරටත් මෙය දරා ගැනීමට අමාරු බවත් හෙතෙම සඳහන් කළේය.
පසු පෙල මන්ත්රීවරුන් ලෙස නායකයන්ට ප්රශස්ති නොකියන බවත් ජනතාව විසින් තමන් පාර්ලිමේන්තු යැවුවේ ප්රශස්ති ගී ගයන්නට ම නොවන බවත් ඔහු පැවසීය.
