පාකිස්තානයේදී ඝාතනයට ලක්වූ ප්‍රියන්ත කුමාර මහතාගේ දේහය හෙට (06) දිනයේදී මෙරටට රැගෙන ඒමට අවශ්‍ය පියවර ගන්නා බව විදේශ කටයුතු අමාත්‍යාංශය පවසයි.
පාකිස්තානු මාධ්‍ය වාර්තා සඳහන් කළේ සිද්ධිය සම්බන්ධයෙන් ප්‍රධාන සැකකරු ඇතුළු 235 දෙනෙකු මේ වනවිට සියල්කොට් පොලීසිය මගින් අත්අඩංගුවට ගෙන ඇති අතර 900 දෙනෙකුට එරෙහිව මූලික පරීක්ෂණ වාර්තා ගොනු කර ඇති බවය.
දැඩි ආන්දෝලනයට තුඩු දී ඇති මෙම සිදුවීම සම්බන්ධයෙන් වැරදිකරුවන්ට උපරිම දඬුවම් ලබාදෙනු ඇති බවට ශ්රී ලංකා රජය සහ ජනතාව තබා ඇති විශ්වාසය උපරිමයෙන් තහවුරු කරන බවට පකිස්තාන අග්‍රාමාත්‍යරයා ජනාධිපති ගෝඨාභය රාජපක්ෂ මහතාට සහතික වී තිබේ.
පාකිස්තානයේ සියල්කොට්හි රාජ්කෝ ක්‍රීඩා ඇඟලුම් කර්මාන්තශාලාවක සාමාන්‍යාධිකාරීවරයෙකු ලෙස සේවය කළ ශ්රී ලාංකිකයෙකු වූ ප්‍රියන්ත කුමාර මහතාව එරට ආගමික අන්තවාදී මතධාරීන් පිරිසක් මිලේච්ඡ අයුරින් ඝාතනය කර සිරුර පුළුස්සා දැමීමට කටයුතු කර තිබුණි.
දැඩි ආන්දෝලනයට තුඩුදී ඇති මෙම සිදුවීම සම්බන්ධයෙන් පාකිස්ථානු මාධ්‍ය වාර්තා කර තිබු‍ණේ ඉස්ලාමයේ නබි මුහම්මද් තුමාගේ නම සහිත පෝස්ටර් අපකීර්තියට පත් කළ බවට කර්මාන්තශාලා සේවකයින් කළ චෝදනාවක් මුල්කරගෙන ඔහුව මෙලෙස අමානුෂික ලෙස ඝාතනය කර ඇති බවය.
පාකිස්තාන අග්‍රාමාත්‍ය ඉම්රාන් ඛාන් මෙම සිද්ධිය සම්බන්ධයෙන් දැඩි ලෙස අවධානය යොමු කර තිබේ.
පාකිස්තාන අග්‍රාමාත්‍ය ඉම්රාන් ඛාන් මහතා ඊයේ පස්වරුවේ නිකුත් කළ ටිව්ටර් පණිවුඩයක දැක්වුණේ ශ්රී ලංකා ජනාධිපති ගෝඨාභය රාජපක්ෂ මහතා සමග එක්සත් අරාබි එමීර් රාජ්‍යයේදී මෙම සිද්ධිය සම්බන්ධයෙන් කතාබහ කළ බවය.
ප්‍රියන්තගේ ඝාතනය සම්බන්ධයෙන් ශ්රී ලංකාවේ ජනතාවට සිය ජාතියේ කෝපය සහ ලැජ්ජාව ප්‍රකාශ කිරීමට එහිදී කටයුතු කළ බවද පාකිස්තාන අග්‍රාමාත්‍යවරයා තැබූ සටහනේ දැක්වෙයි.
මෙම සිද්ධිය සම්බන්ධයෙන් පාකිස්තාන ආග්‍රාමාත්‍යවරයා සහ ජනාධිපති ගෝඨාභය රාජපක්ෂ මහතා අතර දුරකථන සංවාදයක්ද පවත්වා ඇතැයිද ජනාධිපති මාධ්‍ය අංශය නිවේදනය කළේය.
මෙම ඝාතනයට සම්බන්ධ සියලුම අපරාධකරුවන්ට නීතිය උපරිමයෙන්ම ක්‍රියාත්මක කරන බවටත්,පාකිස්තාන අග්‍රාමාත්‍යවරයා ජනාධිපතිවරයා වෙත සහතික වී තිබේ.
එමෙන්ම දෙරට අතර දිගුකාලීන මිත්‍රත්වය සහ විශ්වාසය කිසිවිටෙකත් පළුදුවීමට ඉඩ නොතබන බවද පකිස්තාන අග්‍රාමාත්‍යවරයා ප්‍රකාශ කර ඇතැයි ජනාධිපති මාධ්‍ය අංශය සඳහන් කරයි.
සිදුවීමට අදාළ සියලු වීඩියෝ දර්ශන සහ තොරතුරු මේ වනවිට පාකිස්ථාන ආරක්ෂක අංශ විසින් ලබාගෙන ඇති අතර දැනට අත්අඩංගුවට ගත් පිරිසට අමතරව සෙසු පුද්ගලයින්ද සොයා අඛණ්ඩ මෙහෙයුම් ක්‍රියාත්මක බව පකිස්තාන අග්‍රාමාත්‍යවරයා සඳහන් කර ඇත.
අපරාධකරුවන්ට දෙවියන් වහන්සේගෙන් සමාවක් නොමැති අතර නීතියෙන්ද කිසිදු සමාවක් හිමි නොවන බවත් සාධාරණය ඉටුකර වැරදිකරුවන්ට උපරිම දඬුවම් ලබාදෙනු ඇති බවට ශ්රී ලංකා රජය සහ ජනතාව තබා ඇති විශ්වාසය උපරිමයෙන් තහවුරු කරන බවත් මෙම දුරකථන සංවාදයේදී පකිස්තාන අග්‍රාමාත්‍යවරයා ජනාධිපති ගෝඨාභය රාජපක්ෂ මහතා වෙත සඳහන් කර ඇතැයි ජනාධිපති මාධ්‍ය අංශය වැඩිදුරටත් නිවේදනය කළේය.
මෙි අතර මෙම ඝාතනයට ශ්රී ලාංකික ඉංජිනේරුවකු පකිස්ථානයේ මේ වන විට පුද්ගලයින් 120 කට වැඩි පිරිසක් අත්අඩංගුවට ගෙන ඇත.
එම පිරිස අතර සිද්ධියේ ප්‍රධාන සැකකරුද සිටින බව පකිස්ථාන පොලිසිය කියයි.
මෙම ඝාතනය සිදු කර ඇත්තේ අදාල ඉංජිනේරුවනා සේවය කරන ලද කම්හලේ අලවා තිබූ පෝස්ටරයක් ඉවත් කිරීම හේතුවෙනි.
විදෙස් මාධ්‍ය වාර්තා කරන්නේ මෙම ඝාතනය ‘ටෙහෙරික් ඊ ලබ්බයික්’ නම් සංවිධානය විසින් සිදු කර ඇති බවටයි.
නමුත් එම සංවිධනය අදාල ඝාතනයේ වගකීම භාර නොගන්නා බව සදහන් කර ඇත.
