යුක්රේන ජනාධිපති වොලොඩිමිර් සෙලෙන්ස්කි රුසියානු හමුදාවන්ගෙන් රට ආරක්ෂා කිරීමට සියලු පුරවැසියන් ඉදිරියට පැමිණෙන ලෙස ආරාධනා කරයි.
ඉදිරියට එන සෑම පුරවැසියෙකුටම සෑම කෙනෙකුටම ආයුධ නිකුත් කරන බවද යුක්රේන ජනාධිපතිවරයා පැවසීය.
එහිදී යුක්රේන හමුදාවට අවශ්‍ය සහයෝගය ලබාදෙන ලෙසත් හැකියාව ඇති සියලු දෙනාම තුවක්කුවක් රැගෙන සටනට සුදානම් වන ලෙසත් යුක්රේන ජනාධිපති ව්ලොදිමීර් සෙලෙන්ස්කි ජනතාව අමතා ප්‍රකාශ කර තිබේ.
එමෙන්ම රුසියාව සමග තිබෙන සියලුරාජ තාන්ත්‍රික සබඳතා අත්හරින බවත් ඔහු පවසයි.
රුසියානු ප්‍රහාරය අතීතයේ නාසි ආක්‍රමණයට සමාන බවත් ජනාධිපති සෙලෙන්ස්කි පවසයි.
මෙම ප්‍රහාරය නවත්වන ලෙස ඉල්ලමින් රුසියානු රජයට විරුද්ධව උද්ඝෝෂණ කරන ලෙසත් ඔහු ඉල්ලා සිටියි.
යුක්රේනයේ ජනාධිපති ව්ලොදිමීර් සෙලෙන්ස්කි ජාතිය අමතමින් සංවේදී කතාවක් කළේය. ඔහු ඉන් ආමන්ත්‍රණය කරන්නට උත්සාහ කළේ රුසියානු ජනතාවටයි. මේ එහි සිංහල පරිවර්තනයයි.
“මම අද රුසියානු ෆෙඩරේෂනයේ ජනාධිපතිවරයා වෙත දුරකථන ඇමතුමක් ගත්තා. එයට ප්‍රතිචාරය වූයේ නිහැඬියාවයි. සබැවින්ම නිහැඬියාව පැවතිය යුත්තේ දොන්බාසයේයි. එනිසයි මට අද රුසියානු ජනතාව අමතන්නට අවැසි ව තිබෙන්නේ. මම ඔබ අමතන්නේ ජනාධිපතිවරයෙකු ලෙස නොවෙයි. මම ඔබ අමතන්නේ යුක්රේන පුරවැසියෙකු ලෙසයි.
කිලෝමීටර 2000 ක දේශ සීමාවක් අප බෙදමින් ඇඳී තිබෙනවා. මේ සීමාව දිගේ ඔබේ හමුදාව ස්ථානගත කර තිබෙනවා. 200,000ක පමණ සෙබළුන් ද හමුදාමය යාන වාහන දහස් ගණනින් ද එහි රඳවා තිබෙනවා. ඔබේ නායකයන් අඩියක් ඉදිරියට තබා ඔවුන්ට අන්‍ය දේශ සීමාවකට ඇතුළු වීමට අවසර දී තිබෙනවා. මේ පියවර යුරෝපානු මහද්වීපය මත සිදුවන මහා යුද්ධයක ආරම්භය විය හැකියි.
අපට යුද්ධයක් අවැසි නැති බව අපි ප්‍රත්‍යක්ෂ ව ම දන්නවා. සීතල යුද්ධයක් හෝ උණුසුම් යුද්ධයක් හෝ දෙමුහුම් යුද්ධයක් හෝ අපට අවශ්‍ය වන්නේ නැහැ. නමුත් සතුරු හමුදා අපට පහර දී අපගේ රට, අපගේ නිදහස, අපගේ ජීවිත, අපගේ දරුවන්ගේ ජීවිත උදුරාගන්නට තැත් කරන්නේ නම් අපි ආත්මාරක්ෂාව සලසාගන්නවා. අප පහර දියත් කරන්නේ නෑ. නමුත් අප ආත්මාරක්ෂාව සලසා ගන්නවා. එබැවින් ඔබ අපට පහර දෙන විට දකිනු ඇත්තේ අපගේ මුහුණයි. අපගේ පසුපස නොව ඉදිරිපසයි.
යුද්ධය සුවිසල් ව්‍යසනයක්. මෙලොව ඇති සෑම දෙයකින් ම ඉහළ ම වන්දියක් ගෙවිය යුතු ව්‍යසනයක්. මිනිසුන්ට මුදල්හදල්, කීර්තිය, ජීවිතයේ ගුණාත්මක භාවය ඉන් අහිමි වනවා. ඔවුන්ගේ නිදහස ඉන් අහිමි වනවා. නමුත් ප්‍රධානතම කරුණ නම් මිනිසුන්ට ඔවුන්ගේ ආදරණීයයන් අහිමි වීමයි. ඔවුනට ඔවුන්ම අහිමි වීමයි.
යුක්රේනය රුසියාවට තර්ජනයන් මතුකරන බව ඔවුන් පවසනවා. අතීතයේ දීත් වර්තමානයේ දීත් අනාගතයේ දීත් එය නොවෙයි සත්‍යය වන්නේ. ඔබ NATOවෙන් ආරක්ෂාව පිළිබඳ සහතික ඉල්ලා සිටිනවා. නමුත් අපත් ආරක්ෂාව පිළිබඳ සහතිකයක් ඉල්ලා සිටිනවා. ඔබගෙන් සහ අනෙකුත් බුඩපෙස්ට් සංදේශයේ හවුල්කාර රාජ්‍යයන්ගෙන්.
නමුත් අපගේ මූලිකම අරමුණ යෙදවී ඇත්තේ යුක්රේනයේ සාමය පවත්වා ගැනීම හා යුක්‍රේනියානු ජනතාවගේ ආරක්ෂාවටයි. ඒ වෙනුවෙන් ඔබ ද ඇතුළු ව ඕනෑම අයෙකු සමග, ඕනෑම වේදිකාවක, ඕනෑම ආකාරයේ සාකච්ඡාවක නිරත වීමට අප සූදානම්. යුද්ධය සෑම දෙනෙකුගේ ම ආරක්ෂාව පිළිබඳ සහතිකයන් උල්ලංඝනය කරාවි. ඉන් මතුවට කිසිවෙකුගේ ආරක්ෂාව පිළිබඳ සහතික වීමට නොහැකි වේවි. ඉන් වැඩිපුරම විඳවුම් ලබනු ඇත්තේ කවුරුන් ද?ජනතාවයි. යුද්ධය වැඩිපුරම අනවශ්‍ය දෙයක් වනු ඇත්තේ කාට ද? ජනතාවට! එය වැළැක්විය හැක්කේ කාට ද? ජනතාවටයි. නමුත් එවැනි ඉනතාවක් ඔබ අතරේ සිටිත් ද? සිටින බව මට විශ්වාසයි.
මගේ කතාව ඔවුන් රුසියානු ටෙලි නාලිකා හරහා විකාශය නොකරන බව මම දන්නවා. නමුත් රුසියානු ජනතාව මෙය දැකිය යුතුයි. ඔවුන් සත්‍යය දැනගත යුතුයි. ඒ සත්‍යය නම්, තවත් පමා වන්නට ඉඩ නොහැර මෙය නවතා දැමීමට වේලාව පැමිණ ඇත යන්නයි. රුසියානු නායකයක් අප සමග එක මේසයක හිඳගන්නට නොකැමැති වනු ඇති නමුත් ඔබ සමඟ එකට හිඳගනු ඇති. රුසියානුවන් හට යුද්ධයක් අවැසි ද? මම ඊට පිළිතුරු දැනගන්නට කැමැතියි. නමුත් එම පිළිතුර රඳා පවතින්නේ ඔබ මතයි. රුසියානු ෆෙඩරේෂනයේ පුරවැසියන් මතයි.”
මෙයට පිළිතුරු ලෙස ප්‍රකාශයක් නිකුත් කරමින් රුසියාව කියා සිටියේ තමුන් යුක්රේනය සමග ඇති රාජ තාන්ත්‍රික සම්බන්ධතා අත් හරින බව ප්‍රකාශ නොකළත් ඒ පිළිබඳ සිතමින් සිටින බවයි.
යුක්රේනයේ මෙම තීරණය තාර්කික තීරණයක් බව රුසියානු රජය වැඩි දුරටත් පවසයි.
මෙි අතර කිව් අගනුවරින් විශාල පිරිසක් පළායාමට උත්සාහ දරමින් සිටින අතර මාර්ග රැසක දැඩි රථවාහන තදබද පවතින බව විදෙස් මාධ්‍ය වාර්තා සදහන් කරයි.
මේ අතර යුක්රේනයට එල්ලවන රුසියානු ශෙල් වෙඩි ප්‍රහාරවලින් යුක්රේන හමුදා සෙබලුන් 40 කට වැඩි පිරිසක් මියගොස් ඇතැයි යුක්රේන ජනාධිපති කාර්යාලය පවසයි.
කිව් අගනුවර ඇතුලු යුක්රේනයේ නගර රැසකට මේ වනවිට මිසයිල ප්‍රහාර එල්ලවෙමින් පවතින බව විදෙස් මාධ්‍ය වාර්තා සදහන් කරයි.
