එන්නත්කරණ ප්‍රමුඛතා ලයිස්තු කිසිසේත් දේශපාලන හිතවත්කම් මත ලබා දී නොමැති බවත් ෆයිසර් එන්නත සුපිරි එන්නතක් නිසා හම්බන්තොටට එය ලබාදුන්නා නොවන බවත්, සෑම දිස්ත්‍රික්කයකටම ෆයිසර් එන්නත් ලබාදීමට සූදානම් කර ඇති බවත් නියෝජ්‍ය සෞඛ්‍ය සේවා අධ්‍යක්ෂ ජනරාල් විශේෂඥ වෛද්‍ය හේමන්ත හේරත් මහතා කියා සිටියේය.
ඔහු මේ බව සදහන් කළේ ෆයිසර් එන්නත හම්බන්තොටට ලබාදීමත්, එය හමුදාව භාරයට පත්කිරීමත් ආදී වහයෙන් එන්නත්කරණ ක්‍රියාවලිය සම්බන්ධව මේ දිනවල මාධ්‍යයෙහි සැරිසරන ඇතැම් පුවත් සම්බන්ධව රජයේ නිල පුවත් වෙබ් අඩවිය සිදුකළ විමසුමට ප්‍රතිචාර වශයෙනි.
ෆයිසර් එන්නත විශේෂ එන්නතක් නොවන බවද එය විද්‍යානුකූලව වඩාත් හොදම එන්නත යැයි ප්‍රතයක්ෂ කර නැතැයිද, එය පිළිගැනීමක් පමණක් බවද, සියලුම එන්නත් එකහා සමානව කටයුතු කරන අතරම ලෝක සෞඛ්‍ය සංවිධානය විසින් නිර්දේශ කරන සෑම එන්නතක්ම එකහා සමාන බවද නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා අවධාරණය කළේය.
80% ඉක්මවා එන්නත් කර තිබූ දිස්ත්‍රික්ක වල මෙම එන්නත ලබාදීමේදී කොළඹ සහ කලුතරට සාපේක්ෂව හම්බන්තොට ජනගහණය අඩු බැවින් ලැබුණු ෆයිසර් එන්නත් තොගය සාධාරණ ලෙස එම ප්‍රදේශයේ එන්නත්කරණයට ලබාදුන් බවද, එන්නත්කරණ කටයුතු ක්‍රියාත්මක කිරීමට තරුණ සේවා සභාව ඉදිරිපත් වූ බැවින් ඒ සදහා අවස්ථාව ලබාදුන් බවද ඔහු පැවසුවේය.
ෆයිසර් එන්නත් හමුදාවට භාරදී නොමැති බවද, අධ්‍යාපනය හැදෑරීමට විදෙස්ගතවන්නන් සදහා එන්නත්කරණ ක්‍රියාවලිය හමුදාව හරහා ක්‍රියාත්මක බැවින් එම වැඩසටහනට අවශ්‍ය එන්නත් හමුදාවට ලබාදුන්නද දිගින් දිගටම ෆයිසර් එන්නත් හමුදාවට පමණක් ලබානොදෙන බවද, එන්නත් ලැබීම අනූව සෞඛ්‍ය අමාත්‍යංශය ගන්නා තීරණ මත අදාල ක්‍රමවේදයන් ඔස්සේ එන්නත් බෙදාහැරීම් සිදුකරන බවද ඔහු කියා සිටියේය.
දිවයින පුරා එන්නත්කරණ ක්‍රියාවලිය සෑම දිස්ත්‍රික්කයකම මේ මොහොතේ ක්‍රියාත්මක වන බවත්, එන්නත් තොග ලැබෙන පරිදි සෞඛ්‍ය අමාත්‍යංශය එක් එක් දිස්ත්‍රික්ක වලට සාධාරණ වශයෙන් එන්නත් බෙදාහැරීම සිදුකරන බවද, එන්නත්කරණ වැඩසටහන තුළ දෛනිකව ලක්ෂ 05 ඉක්මවා එන්නත්කරණය සිදුකළ අවස්ථා පැවති බව සිහිපත් කරමින් විහේෂඥ වෛද්‍ය හේමන්ත හේරත් මහතා වැඩිදුරටත් කියා සිටියේ එන්නත් ලැබෙන්නේ නම් දිනකට මිලියනයකට හෝ එන්නත් ලබාදිය හැකි බවයි.
මහනුවර ස්පුට්නික් පළමු එන්නත ලබාදෙන අවස්ථාවේ අත්සන් ලබාගැනීම සම්බන්ධයෙන් මාධ්‍ය වල පළවන පුවත් සම්බන්ධව අදහස් දක්වමින් නියෝජ්‍ය සෞඛ්‍ය සේවා අධ්‍යක්ෂ ජනරාල්වරයා මෙලෙස කියා සිටියේය.
