වයඹ පළාතේ ජීවත් වන තමන්ට ඉදිරි වයඹ මහ ඇමති සටනේදී අග්‍රාමාත්‍ය මහින්ද රාජපක්ෂ මහතාගේ පුත් යෝෂිත රාජපක්ෂ කිසිදු ආකාරයක අභියෝගයක් නොවන බව බතික් අත් යන්ත්‍ර රෙදිපිළි සහ දේශීය ඇඟළුම් නිෂ්පාදන රාජ්‍ය අමාත්‍ය දයාසිරි ජයසේකර මහතා ඊයේ (13දා) කුරුණෑගලදී ප්‍රකාශ කළේය.
කුරුණෑගල පැවති රැස්වීමකට සහභාගි වීමෙන් අනතුරුව මාධ්‍යවේදීන් හමුවේ රාජ්‍ය අමාත්‍යවරයා මේ බව ප්‍රකාශ කළේය.
යෝෂිත රාජපක්ෂ මහතා ඉදිරි වයඹ පළාත් සභා මැතිවරණයේදී මහ ඇමති ධූරයට තරඟ කරන බවට රාවයක් පමණක් පැතිර ඇති බවද ඔහු ඒ සඳහා පැමිණෙනවාද නැද්ද යන්න එදිනට තීරණය කළ හැකි බවද දයාසිරි ජයසේකර මහතා සඳහන් කළේය.
“ඔය කියන කවුරුත් වයඹ පළාතේ ඉපදුනු මට අභියෝගයක් නොවෙයි. වයඹ පළාතේ ජනතාව එදා වගේම අදටත් මට හොඳින් සලකනවා. ඒ නිසා මේ පළාත් සභා මැතිවරණයේදීත් වයඹ ජනතාව මට හොඳින් සලකයි කියලා මම විශ්වාස කරනවා.
මේවනවිට රටේ ඇති වෙලා තියෙන පොහොර ප්‍රශ්නය මට නම් බලපෑමක් ඇති කරලා නැහැ. මොකද ගමේ ඉන්න මා ගැන ගමේ ජීවත් වෙන ගොවියෝ හොඳට දන්න නිසා මේ දයාසිරි ජයසේකරට ඔය අනික් අයට වගේ ගමට යන්න බැරි තත්ත්වයක් නම් උදා වෙලා නැහැ. මම හැමදාමත් හිටියේ ගමේ ජනතාවත් එක්ක. ඉදිරියටත් මම ඉන්නේ ගමේ ජනතාව සමගයි.
මේ කාබනික පොහොර ප්‍රශ්නයට ඉක්මණින් විසඳුමක් ලබා නොදුන්නොත් ඒක ජනාධිපතිතුමා වගේම මේ රජයත් විනාශ කරලා දමන ප්‍රශ්නයක් බවට පත් වෙයි”
