කිරි පිටි මිල ඉහළ දැමීම සම්බන්ධයෙන් රජයට මැදිහත්වීමක් සිදු කිරීමට නොහැකි බව වෙළද අමාත්‍ය ආචාර්ය බන්දුල ගුණවර්ධන මහතා අද (30දා) ඌරගස්මංහන්දිය ප්‍රදේශයේදී කීවේය.
ඌරගස්මංහන්දිය ප්‍රදේශයේ පැවති උත්සවයකින් අනතුරුව මාධ්‍යවේදීන් නැගූ ප්‍රශ්නයකට පිළිතුරු දෙමින් ගුණවර්ධන මහතා එසේ කීවේය.
අද (30) මධ්‍යම රාත්‍රීයේ සිට කිරි පිටි මිල ඉහළ දැමීමට කිරි පිටි ආනයනය කරන සමාගම් කටයුතු කිරීම සම්බන්ධයෙන් රජයට යම් මැදිහත්වීමක් සිදු කළ නොහැකිදැයි එම අවස්ථාවේදී මාධ්‍යවේදීන් වෙළද අමාත්‍යවරයාගෙන් විමසා සිටියේය.
“කිරි පිටි මිල වැඩි කරන්නේ රජය නෙමෙයිනේ. කිරි පිටි මිල වැඩි කරන්නේ බහු ජාතික සමාගම්නේ. රජය වැඩි කරනවානම් තමයි මැදිහත්වීමක් සිදු කරන්න පුළුවන්. බහු ජාතික සමාගම් මීට පෙර කිරි පිටි ආනයනයෙන් ඇති තරම් මුදල් හම්බ කරගෙන තමන්ගේ රටවල්වලට මුදල් ගෙනගියා.
මේ අමාරුම අවස්ථාවේ බහු ජාතික සමාගම් කිරිපිටි මිල ඉහළ දැමීම අනුමත කරන්න බැහැ.මොකද ඒ අය කිරි පිටි ආනයනය කරලා මුදල් හොදට හම්බ කරගත්තා.” යැයි ඇමතිවරයා පවසා සිටියේය.
