විදුලිය අරපිරිමැස්මෙන් භාවිතා කිරීමට රටේ සියලු ජනතාව කටයුතු නොකළහොත් ඉදිරියේදී විදුලි කප්පාදුවකට යාමට සිදුවන බව මහජන උපයෝගිතා කොමිෂන් සභාව සඳහන් කරයි.
විදුලිය අරපිරිමැස්මෙන් භාවිතා කිරීම සඳහා තම කොමිසම විසින් ලබාදුන් නිර්දේශ පළාත් පාලන ආයතන ඇතුළු රජයේ ආයතන වලින් නිසි පරිදි ක්‍රියාත්මක කිරීමක් දක්නට නොලැබෙන බව ද එහි සභාපති ජනක රත්නායක මහතා සඳහන් කරයි.
අවස්ථා කිහිපයකදීම මෙම නිර්දේශ ගැන රජයේ ආයතනවල දන්වා ඇතත් ඊට අවධානය නොදැක්වීම කණගාටුවට කරුණක් යයිද ඔහු කියා සිටියේය.
එමෙන්ම ව්‍යාපාරික ප්‍රජාව ද පවතින තත්ත්වය නොසලකා හරිමින් අනවශ්‍ය ලෙස ඩිජිටල් දැන්වීම් පුවරු ප්‍රදර්ශනය කරමින් සිටින බවත් පැවසූ ඔහු විදුලිය පරිභෝජනය කරන සාමාන්‍ය ජනතාවගෙන් පවා මේ මොහොතේ සහායක් නොලැබෙන බවද පැවසීය.
මේ ආකාරයට පවතින ගැටළු නිරාකරණය කර ගැනීම සඳහා පොදුවේ සියලු දෙනා සහාය ලබා නොදෙන්නේ නම් විදුලිය කප්පාදුවක් හැර වෙන විසඳුමක් නැති බවද ඔහු අවධාරණය කරයි.
මේ අතර විදුලිය අඩු පරිභෝජනයක් තිබූ ඊයේ (3) රාත්‍රී විදුලි කප්පාදුව කඩාකප්පල්කාරී ක්‍රියාවක් බවත් ඒ සම්බන්ධයෙන් වාහාම නීතිමය ක්‍රියාමාර්ග ගන්නා බවත් දත්ත අනුව විදුලිය පරිභෝජනය ඊයේ රාත්‍රී ඉතාමත් අඩු මට්ටක පැවැති නිසා විදුලිය කැපීමකින් තොරව සිටීමට අවස්ථාව තිබූ බවත් මහජන උපයෝගිතා කොමිසම පැවසීය.
