ඉන්දියාව අභ්‍යවකාශ නිෂ්පාදනය දෙස අවධානය යොමු කිරීමට කාලය එළඹ ඇති බව එරට සිවිල් ගුවන් සේවා අමාත්‍ය ජෝතිරාදිත්‍ය සින්ඩියා පවසයි.
පසුගියදා නිමාවූ ගුවන් සේවා උපදේශක CAPA India විසින් සංවිධානය කරන ලද සමුළුවකදී ඇමතිවරයා මේ බව සඳහන් කළේය.
අමාත්‍යවරයා පැවසුවේ ඉදිරි වසර පහ හෝ හත තුළ අභ්‍යන්තර ගුවන් සමාගම් එක්ව ගුවන් යානා 2,000 ක පමණ ඇණියක් ඇති කිරීමට සැලසුම් කර ඇති බවයි. ඉන්දියාව සතුව දැනට ගුවන් යානා 700ක් පමණ ඇත.
දේශීය ගුවන් සේවා අංශය සෑම අංශයකින්ම ඉහළ ඉලක්ක අත්පත් කර ගනිමින් සිටින අතර, විශේෂයෙන්ම මගී ප්‍රවාහනය පිලිබඳ නවතම වාර්තාවන්ට අනුව දිනකට මගීන් 456,000 පමණ ප්‍රවාහනය කෙරෙන බවද ඔහු පැවසීය.
CAPA INDIA ප්‍රක්ෂේපනවලට අනුව, රටේ දේශීය මගී ප්‍රවාහනය වත්මන් මූල්‍ය වර්ෂය සඳහා ඇස්තමේන්තුගත මිලියන 137.5 සිට 2023-24 මූල්‍ය වර්ෂයේදී මිලියන 160 දක්වා ඉහළ යනු ඇත.
2029-30 වන විට ඉන්දියාවේ දේශීය ගුවන් මගීන් සංඛ්‍යාව මිලියන 350 දක්වා ඉහළ යනු ඇතැයි ඇස්තමේන්තු කර තිබේ.
