මොහොමඩ් හෆීස් ජාත්‍යන්තර ක්‍රිකට් පිටියට සමුදෙයි

වසර 18ක් පුරා ජාත්‍යන්තර ක්‍රිකට් පිටියේ ජයකෙහෙළි නැංවූ පාකිස්තාන තුන් ඉරියව් ක්‍රීඩක මොහොමඩ් හෆීස් ජාත්‍යන්තර ක්‍රිකට් පිටියට සමු දීමට තීරණය කර තිබෙනවා.

පාකිස්තානයේ ලාහෝර් නුවර පැවති මාධ්‍ය හමුවකදී මොහොමඩ් හෆීස් ඒ බව නිවේදනය කර ඇත.ඔහු මේ වනවිට 41 හැවිරිදි වියේ පසුවෙයි.

හෆීස් 2018 වසරේදී ටෙස්ට් පිටියෙන් සමුගත් අතර 2019 ලෝක කුසලාන තරගාවලියෙන් අනතුරුව එක්දින ජාත්‍යන්තර පිටියට සමු දී තිබේ.

ඔහු පසුගියදා පැවති 20/20 ලෝක කුසලාන තරගාවලියට ද එක්විණි.

වසර 18ක ජාත්‍යන්තර ක්‍රිකට් දිවියට ඔහු සමු දුන් නමුත්, ඉදිරියටත් ඔහු 20යි 20 ලීග් තරග (T20 franchise cricket) සදහා ක්‍රීඩා කිරීමට නියමිතයි.

ඒ අනුව 2003 වසරේ දී ජාත්‍යන්තර වරම් දිනා ගත් මොහොමඩ් හෆීස් ක්‍රීඩා කළ අවසන් ජාත්‍යන්තර තරගය වන්නේ පසුගිය නොවැම්බර් මාසයේ දී නිමා වූ 20යි 20 ලෝක කුසලාන ක්‍රිකට් තරගාවලියේ ඔස්ට්‍රේලියාවට එරෙහි අවසන් පූර්ව තරගයයි.

ඔහු ජාත්‍යන්තර පිටියේ දී ටෙස්ට් තරග 55ක්, එක්දින තරග 218 ක් හා 20යි 20 ජාත්‍යන්තර තරග 119 ක් ක්‍රීඩා කළ අතර, එහිදී තරග රටා ත්‍රිත්වයේ දී ම රැස් කළ ලකුණු සංඛ්‍යාව 12,780 ක්.

ජාත්‍යන්තර තරග 392 කට සහභාගී වී ඇති ඔහු ද්විත්ව ශතක 1 ක්,ශතක 21 ක්,අර්ධ ශතක 64 ක් හා කඩුලු 253 ක් රැසක් කරගෙන තිබෙි.

මීට පෙර 2018 වසරේ දෙසැම්බර් මාසයේ දී මොහොමඩ් හෆීස් ටෙස්ට් ක්‍රිකට් පිටියට සමු දීමට පියවර ගත්තා.

පාකිස්තාන කණ්ඩායමේ නායකත්වය ද දරා ඇති ඔහු 2012 පන්දුවාර 20යි 20 ලෝක කුසලාන ක්‍රිකට් තරගාවලියේ අවසන් පූර්ව වටය දක්වා පාකිස්තානය රැගෙන යාමට සමත් වුණා.

ජාත්‍යන්තර තරග 392 ක්..
ලකුනු 12,780 ක්..
ද්විත්ව ශතක 1 ක්..
ශතක 21 ක්..
අර්ධ ශතක 64 ක්..
කඩුලු 253 ක්..