යේමනයේ හූති සටන්කාමීහූ රතුමුහුද, අරාබි මුහුද ආශ්‍රිතව විනාශකාරී ක්‍රියා වල නියැලෙමින් මගී සහ භාණ්ඩ ප්‍රවාහන නෞකා වෙත බාධා පමුණුවමින් සිටිති. සූවස් ඇලේ සිට එන විට හමුවන ‘බාබ් අල්-මන්දාබ්‘ සමුද්‍රසන්ධිය ආශ්‍රිතව ගමන්කරන නෞකා වලට පහර දෙමින් සිටිති.
මේ හේතුව නිසා නෞකා වලට අප්‍රිකාව වටා දීර්ඝ නාවික සැතපුම් ගණනක් ගමන්කොට මෙකී මුහුදු මාර්ගයට අවතීර්ණ වීමට සිදුව ඇති අතර, එය නැව්ගාස්තු මෙන්ම සියලු වියදම් ඉහළ යාමට හේතුවක් වී ඇත. එලෙසම කොළඹ වරාය මෙන්ම ඉන්දියාවේ බටහිර වරායන් පවා මේ හරහා අවධානමකට ලක්වී ඇත.
මේ තත්ත්වයට පිළියමක් ලෙස අමෙරිකා, කැනඩා, ඉන්දියා, ඉතාලි වැනි රටවල් රැසක යුද නෞකා සමුද්‍රාරක්ෂාව වෙනුවෙන් දැනටමත් එහි යවා තිබෙනවා. එම ආරක්ෂක සන්ධානය වෙත ශ්‍රී ලංකා නාවික හමුදාවේ ‘සයුරළ‘ නෞකාව සහ නාවික බලඇණියක් යැවීමට ශ්‍රී ලංකා ජනාධිපතිවරයා තීරණය කරන්නේ මේ තත්ත්වය අනුව යි.
එසේ සිදු නොවුවහොත් ශ්‍රී ලංකාවේ කොළඹ වරාය දැඩි තර්ජනයකට ලක්වන අතර එය මඟහැර නෞකා පහළින් පිහිටි හම්බන්තොට වරායට ලඟාවනු ඇති බවත්, එහි අයිතිය ඇත්තේ චීනයට වන නිසා එයින් ශ්‍රී ලංකාවට අත්වන ලාභයක් නැති බවත් ආර්ථික විශේෂඥයෝ පෙන්වා දෙති.
රතු මුහුදේ ‘දැතිමෝරු‘ සමඟ සටනට ‘සයුර‘ පිටත් වේ… ආසියාවටම අභිමානයක් – හින්දුස්ථාන් ටයිම්ස්
