අදටත් පාස්කු ප්‍රහාරයේ මහ මොළකරුවන් අල්ලන්නට ආණ්ඩුව සමත් වී නැති බවත් අදාළ පරීක්ෂණ කිසිවක් විශ්වාසනීය ලෙස සිදු නොවන බවත් විපක්ෂ නායක සජිත් ප්‍රේමදාස මහතා පවසයි.
මෑතකදී බොරැල්ල සියලු ශාන්තුවරයින්ගේ දේවස්ථානයෙන් ග්‍රෙනේඩ් බෝම්බයක් හමුවමේ සිදුවීම පිළිබඳව සිදුකෙරෙන පරීක්ෂණ වල ස්වභාවය හේතුවෙන්ම අදාල සැකය තවදුරටත් තීව්‍ර්ර වන බවයි ඒ මහතා සඳහන් කළේ.
එසේම, අතිඋතුම් කාදිනල් හිමිපාණන් වහන්සේ කරන ඉල්ලීම පවා මායිම් නොකරන ආණ්ඩුව මේ සියල්ල විහිළුවකට ගෙන ඇතැයි පැවසූ විපක්ෂ නායකවරයා, පාස්කු ප්‍රහාරයට මුවාවී බලය ලබාගත් ආණ්ඩුව, අද ඒ සියල්ල අමතක කොට ඇතැයි ද ප්‍රකාශ කළේය.
අද වන විට පාස්කු ප්‍රහාරය සම්බන්ධයෙන් බරපතළ සැකයක්,මුළු මහත් සමාජය තුළම නිර්මාණය වී ඇතැයි ද, ආණ්ඩුවේ සැකකටයුතු හැසිරීම සහ අදාළ පරීක්ෂණ පිළිබඳව ඇති මන්දගාමි ස්වරූපය ඒ බව මනාව ඔප්පු කොට ඇතැයි ද විපක්ෂ නායක සජිත් ප්‍රේමදාස මහතා පැවසීය.
පාස්කු ප්‍රහාරයේ මහ මොළකරු ඇතුළු චූදිතයින් සියලු දෙනාට සාධාරණ ස්වාධීන පරීක්ෂණයක් තුලින් ලබාදිය යුතු උපරිම දඬුවම ලබාදීමට තමන් කිසිවිටකත් පසුබට නොවන බව පැවසූ විපක්ෂ නායකවරයා, මේ ආණ්ඩුව යටතේ එවැන්නක් බලාපොරොත්තු වීම විහිළුවක් බවත් සඳහන් කළේය.
“සත්‍ය සොයන්න කියලා කාදිනල් හිමියන් ආරක්ෂක අංශයට කියනවා. පාස්කු ප්‍රහාරයේ මහමොළකරුවන් ටිකත් අද අල්ලන්න බැරිවෙලා තිබෙනවා මේ ආණ්ඩුවට. මේ සිද්ධිය නිසා ආණ්ඩුව කතෝලික ප්‍රජාවගේ දැඩි විවේචනයට ලක්වෙලා තිබෙනවා. මෙතනින් නිර්මාණය වෙනවා අවිශ්වාසය. මේක හොඳ දෙයක් ද? විනිවිඳභාවයෙන් යුත් පරීක්ෂණයක් පවත්වන්න. පාස්කු ප්‍රහාරයේ මහමොළකරුවන්ට ලබාදිය යුතු දැඩිම දඬුවම ලබාදෙන්නට සමගි ජනබලවේග රජයක් තුළ අපි කටයුතු කරනවා.”
විපක්ෂ නායක සජිත් ප්‍රේමදාස මහතා මේ බව පැවසුවේ මස්කෙලිය පැවති ජන හමුවකට ඊයේ (16) එක්වෙමිනි.
