මෙවර මහමැතිවරණයට  ගම්පහ දිස්ත්‍රික්කයෙන් එක්සත් ප්‍රජාතන්ත්‍රවාදී හඬ පක්ෂයෙන් තරගවදින තිළිණ ජයවර්ධන සමග පැවැත්වූ සම්මුඛ සාකච්ඡාවකි.

තිළිණ,  මෙවර මහමැතිවරණයට නවක මුහුණු රැසක් කළඑලි බහිනවා. ඇයි ඔබ මැතිවරණයට තරග කරන්න හිතුවෙ..?

ඇත්තටම මම දේශපාලනයට එන්න ලොකු බලාපොරොත්තුවක් තිබ්බේ නෑ.  නමුත් ජනතාව ක්‍රමයේ වෙනසක් ඉල්ලුවා. ඔවුන් ලොකු විප්ලවයක් කරා.  වෙනදට දේශපාලනය කරපු අය කළ යුතු දේ වුණේ රටේ නීති සහ ප්‍රතිපත්ති සකස් කරන්න. නමුත් තහඩු බෙදන්න, ලයිට් එකක් දාන්න කරපු දේශපාලනය නිසා මේ ක්ෂේත්‍රය මිනිස්සුන්ට තිත්ත වුණා. ඒ අතරෙ තමයි මහා නළුවෙක් වෙන රන්ජන් රාමනායක මහත්මයා අලුත් දේශපාලන ප්‍රවාහයකින් කළඑළි බහින්නේ. පක්ෂයෙන් ලැබුණු ආරාධනාව එක්ක මටත් හිතුණා මට මගේ අත්දැකීම් වලින් මොනව හරි කරන්න පුළුවන් වෙයි කියලා.

මොකක්ද ගෙදරින් සහ හිතවතුන්ගෙන් මේ තීරණය ගනිද්දි ලැබිච්ච ප්‍රතිචාරය?

ඇත්තටම ගෙදරින් නං කිව්වේ වැඩේ හොඳවුණත් නිකරුණේ නොකරපු දේට බැනුම් අහන්න වේවි… ඔයාට ඒවා දරාගන්න පුළුවන්ද වගේ කතා… හැබැයි ඉතින් අපි මිනිස්සුන්ට ඇත්ත කියනවා නම්, බොරු කරන්නේ නැත්තං අපි මොකටද බය වෙන්නේ? අවංකව දේශපාලනය කරපු මිනිස්සු ලංකාවේ ඉන්නවා. මමත් ආස එහෙම කෙනෙක් වෙන්න. නැතුව බිස්නස් කරන්න මිනිස්සුන්ගේ ඡන්දෙ අරගන්න ඕනි කියන තැන මම නෑ, මගේ නායකයත් නෑ.. නායකයා වුණත් කිසිම අපරාධමය හෝ වෙනත් වරදකට සිරගත වුණේ නෑ. ඔහුට ඒක සිද්ධ වුණෙත් මේ ක්‍රමයේ වැරැද්ද නිසා.  හැබැයි මට යාළුවන්ගෙන් උදව් ලැබුණා.  ඔවුන් මාව ධෛර්යමත් කරා. ඒ නිසා මම සෑහෙන තරමක් දේවල් ඉගෙනගෙන හෙමින් මේ ගමන යනවා.

පවුලෙ විස්තර සහ ඔබේ තොරතුරු කිව්වොත්? මොකද ඉස්සර දේශපාලනයට ආවේ සුදුස්සෝ නෙවෙයි කියල මිනිස්සු කියනවා….

ඒක ඇත්ත. ඒක නිසා තමා අපිට ලොකු මහන්සියක් දරන්න වෙලා තියෙන්නේ ඡන්දයක් කරන්න. මම ගැන කිව්වොත් මම සංචාරක මාර්ගෝපදේශකයෙක් සහ වෘත්තිය දේශකවරයෙක් විදියට කටයුතු කරනවා. මම දේශපාලනය කරන්න කාලෙකට කලින් සමාජ සේවය කරන්න පටන් ගත්තා සිංහ සමාජය වගේ තැන්වලින්. ඒ වැඩ අපි සතුටෙන් කරන්නේ. ඒවයින් උපයපු දේ තමා මිනිස්සුන්ගේ මුහුණුවල සිනහව. ආයෙ අපිට සතුටින් ඉන්න මිනිස්සු දකින්න ආසයි. ඒ වෙනුවෙන් තමයි  මේ උත්සාහය.  මුලින් ඇහුවනේ පවුලෙ විස්තර ඇත්තටම මම විවාහකයි. බිරිඳ සහ දරුවන් තුන්දෙනෙක්ගෙ පියෙක්. ඒ නිසා අනික් මිනිස්සුන්ට දැනෙන අවශ්‍යතා අපිටත් තියෙනවා. ඒ නිසා මිනිසුන්ගේ උවමනා එපාකම් අපි දන්නවා.  මම ගම්පහ බණ්ඩාරනායක විද්‍යාලයේ  සහ ගණේමුල්ල හේමමාලි විද්‍යාලයෙන් තමයි අධ්‍යාපනය හැදෑරුවෙ. ඊට පස්සේ උසස් පාඨමාලා කිහිපයක් හදාරලා තමයි මේ සංචාරක ක්ෂේත්‍රයට ආවේ.  ඉතින් මහජන බදු මුදලින් තමා අපි ඉගෙන ගත්තේ. ඉතින් අපිටත් යුතුකමක් තියෙනවා ආපහු යමක් රටට දෙන්න. මට ජීවත් වෙන්න හොඳ ආදායමක් සහ අනෙකුත් භෞතික සම්පත් තියෙන නිසා මට හොරකම් කරල, බොරු කියල මිනිස්සුන්ගෙන් ගන්න දෙයක් නෑ.

හොඳයි තිළිණ, දැන් මොකක්ද ඔබේ දැක්ම…මොනවගේ දෙයක්ද පාර්ලිමේන්තු තේරීපත්වුණාම කරන්න හිතාගෙන ඉන්නේ? අනික් දේ තමයි ඇයි ලොකු පක්ෂයකට සම්බන්ධ නොවුණේ?


අන්තිම ප්‍රශ්නෙට මුලින් උත්තර දීලා ඉන්නම්. සාම්ප්‍රදායික දේශපාලන පක්ෂවල ලඟම හිතවතුන් මගේ ඉන්නවා. ඒ අයට මම මේ ප්‍රවෘත්තිය කිව්වාම ඇතැමුන්ගේ මුහුණු අවුල් ගියා. ඒකට හේතුව ඇයි ඒ අයගෙන් නොමිනේෂන් නොදුන්නේ වගේ එකක් නිසා. ඇත්තම කිව්වොත් සාම්ප්‍රදායික දේශපාලන පක්ෂ මිනිස්සුන්ට එපාවෙලා. ඒවයෙ දේවදූතයො හිටියත් මිනිස්සු බලන්නේ අර පරණ විදියට තමයි. ඒක නිසා තමයි රන්ජන් රාමනායක මහත්මයා එක්ක එකතුවුණේ. රුපියලක් වත් වංචා නොකරපු මිනිහෙක් එක්ක අපිට උනත් එකට හිටගන්න පුළුවන්නේ. 

අනෙක් කාරණාවට ගියොත් අපි ගම්පහ සංවර්ධනයෙදි මහා විශාලා මාතෘකා පාදක කරගන්නේ නෑ. ඒකට හේතුව තමයි අපි අපට කළ හැකි දේවල් ගැන ජනතාවට ඇත්ත කියන්න ඕනි. ආණ්ඩුවක් වගේ සියලුම ක්ෂේත්‍රවල සංවර්ධනයන් තනි මනුස්සයෙක්ට කියන්න බෑ. අපි පාර්ලිමේන්තු යන්නේ මූලිකව කරුණු හතක් ගම්පහට ඉෂ්ට සිද්ධ කරන්න.

ගම්පහ ගත්තාම ජාත්‍යන්තර ගුවන්තොටුපළ තියෙන එකම දිස්ත්‍රික්කය. හම්බන්තොට තිබ්බට ඒකට ගුවන් යානා යන්නෑනේ. ඉතින් අපිට වෙරළෙ ඉඳන් කඳුකර භූමිය දක්වා පැයක් තුළ යන්න පුළුවන්. පැය භාගෙකින් රක්ෂිත වනාන්තරයකට යන්න පුළුවන්.  කඳුකර ආරණ්‍ය වන සෙනසුන් ඇතිතරම් තියෙනව මෙඩිටේෂන් වලට එන සංචාරකයන්ට. වෙල්නස් ටුවරිසම් වලට අපිට ගම්පහ ආයුර්වේදයට අපූරුවට පාවිච්චි කරන්න පුළුවන්. පංච කර්ම චිකිත්සාවන් එහෙම අපිට විදේශිකයන්ට ලබා දීලා ඉහළ මුදලක් උපයන්න පුළුවන්. ඔය ස්පා වගේ දැන් මිනිස්සු බනින ස්ථාන වෙනුවට ඉතාම වෘත්තිමය අන්දමින් සේවා ස්ථාන හදන්න පුළුවන්. ඒ ස්පා වල වැඩකරන ළමයින්ට ගෞරවනීය රැකියාවක් උරුම කරන්න පුළුවන්. මේක දිග කතාවක් නිසා කෙටියෙන් කියන්නෙ. මොකද තවත් කාරණා 6ක් තියෙනවා.

අනෙක් කාරණාව තමා කසල බැහැර කිරීම. ගම්පහ වොලිබෝල් පිටිය එහා පැත්තේ කසල අංගණයක්. කොහොමද නාහෙ තියං ක්‍රීඩා කරන්නේ? විෂ වායු එන්නේ නැද්ද? මේවා තමා ප්‍රශ්න. අනික මිනිස්සුන්ට බැනල වැඩක් නෑ කියල දෙන්නේ නැතුව. කුණු වර්ගීකරණය කරන්න. ආහාර අපද්‍රව්‍ය වලින් පොහොර හදන්න. නියමු ව්‍යාපෘති විදියට ජීව වායු ටැංකි ලබා දීලා ඒ අයගේ බලශක්ති අවශ්‍යතා සම්පූර්ණ කරන්න මහා ලොකු වියදමක් යන්නෑ. අපිට මන්ත්‍රී ප්‍රතිපාදන වලින් පාරවල් හදනවට වඩා කෝටි ගණං දීලා මේ වගේ දේවල් කරන්න පුළුවන්. මිනිස්සුන්ගේ සාක්කුවට සහනයක් සලසන දේවල් තමයි අපි සැලසුම් කරල තියෙන්නේ.

දැන් ඔය දේවල් වලට කෝ සල්ලි? කියන්න පුලුවන්. නමුත් කරන්න පුළුවන්ද?

අපි මේ කියන දේවල් රජයේ මුදල් වලින් කළ යුතු දේවල් නොවෙයි. අපිටම තනියම පටන් අරං කරන්න පුළුවන් දේවල්. කුණු වර්ගීකරණය කරන්න, පෝර හදන්න සල්ලි යන්නෑ. ඒ වගේම අපිට ලැබෙන ප්‍රතිපාදන වැය කළ යුත්තේ ජනතා අවශ්‍යතා වලට. පාරක් හදන්න කියල කොන්තරාත්කාරයා පාර හදනව ලාබ මිලියන ගණං තියාගෙන…අවුරුද්දෙන් පාර ඉවරයි! නමුත් මිනිහෙක්ට ජීව වායු ටැංකියක් දෙන්න රුපියල් පණස්දාහක්වත් යන්නෑ. හැබැයි ඒ මිනිහා ජීවිත කාලෙම ඒකෙන් ප්‍රතිලාභ ලබනවා. පෞද්ගලිකව ජපන් රටේ ආයෝජකයො එක්ක මට සබඳතා තියෙනවා. ඒ අය උදව් කරන්න ලෑස්තියි. ඒ වගේම අපේ රටේ ව්‍යවසායකයො, දානපතියො ඉන්නවා, රාජ්‍ය නොවන සංවිධාන තියෙනවා.. මේවා හොඳටම ප්‍රමාණවත්. වසර පහකින් අපි ගම්පහ වෙනස් කරල පෙන්නනවා. නැත්තං ආයේ ඡන්ද ඉල්ලන්නෑ…

දැන් අපි කාරණා දෙකක් ගැන කතාකරා.  ඉතිරි කාරණා පහ ගැනත් කිව්වොත් වැදගත් වේවි.

ඔව්. අනික තමා පුහුණු ශ්‍රමිකයින් විදෙස් රැකියා වලට යොමු කිරීම. මම අර කිව්වා වගේ ජපානය වගේ රටවල අය කියනවා…අපිට උඹලගේ මිනිස්සු ඕනි. හැබැයි ඒ අයට අපේ භාෂාව උගන්නවල එවපං‘‘ කියල කියන්නේ. අපි ඉංග්‍රීසිවත් හරියට බැරි, කිසිම වෘත්තියක් කරගන්න බැරි අය රට රස්සා යවනව. අම්මලව ඩුබායි වල බත් තම්බන්න යවනවා. පවුල් පිටින් විනාස වෙනව මෙහේ. අනික ලක්ෂ ගණං හම්බවෙනවද? නෑ!  නමුත් ප්‍රයිමුවර් , කැටපිලර්වගේ යන්ත්‍රෝපකරණ පුහුණුවක් දීලා මිනිහෙක් රට යැව්වොත් ලක්ෂ දෙක තුනක් පඩිය ලැබෙනවා. අපි නුපුහුණු ගෘහ සේවකයො වෙනුවට යවන්න ඕනි පුහුණු වෘත්තිකයො.

තවත් දෙයක් තමා ගංවතුර. ගම්පහ පොඩි වැස්සටත් යටවෙනවා… ජාඇලට වෙනකං වගේම වේයන්ගොඩ පැත්තත් යටවෙනවා. මිලිමීටර් 100ක වැස්සක් දැන් දරාගන්න බෑ. අවිධිමත් සංවර්ධනය, වගුරු, කුඹුරු ගොඩකරල කරන ඉදිකිරීම්, අධිවේගී මාර්ගයේ සැපයුම් මාර්ග වැටී තිබීම, වතුර බැසයන කානු පද්ධති පිළිසකර නොකිරීම වගේ දේවල් මේ තුළ තියෙනවා. මේවා අපිට නීති අණ පණත් මගින් කළ හැකි සහ පාලනය කළ හැකි තත්ත්වයන්. අපි ඉංජිනේරුවරුන් ලවා මේවා අධීක්ෂණය කරවල සැලසුම් හදල ඉවරයි.

අනික් කාරණාව තරුණයින්. ඔවුන්ට අනාගතයක් තියෙන්න ඕනි. ත්‍රීවීල් එකක් අරං පාරට එන එකම නෙවෙයි ජීවිතේ දිනනවා කියන්නේ. මම රැකියාවක් පහත් කොට කියනව නෙවෙයි. නමුත් ඊට එහා ලෝකයක් තියෙනව කියල ඒ අයට පෙන්නල දෙන්න ඕනි.  ක්‍රීඩාව වැඩිදියුණු කරන්න ඕනි. ගම්පහ වොලිබෝල් වලට ප්‍රසිද්ධ වුණාට දැන් මොනාද තියෙන්නේ?

කාන්තාවන් වැඩිම පිරිසක් ඉන්නේ ගම්පහ 52%ක්! මේ අය පවුල තුළ හිංසනයට ලක්වීම, දරුවන්ට තියෙන පීඩනය, ඩිප්‍රෙෂන් වගේ තත්ත්වයන් නිසා කාන්තාවන් ගැන අපි සතුව වෙනම කියවීමක් තියෙනවා. ඒ අයගේ හැකියාවන් වලින් වැඩක් අරං ගෙදරට හිරවෙලා ඉන්න තැනින් උඩට ගන්න අපිට හැකියාව තියෙනවා.

අධ්‍යාපනය ගැනත් නොකියා බෑ මොකද වැඩිම ජාතික පාසල් ප්‍රමාණයක් තියෙනවා. නමුත් ළමයින්ගේ ප්‍රතිඵල මදි. ඒ වගේම මන්දපෝෂණය තියෙනවා. ළමයි උදේ රැස්වීම් වලදි හැමදාම 10ක් වත් ක්ලාන්තය හැදිලා වැටෙනවා. උදේට බඩට හොඳ ආහාර වේලක් වැටෙන්නෑ. කැපකරු මාපිය ක්‍රමය, දානපතියන්, ආදි සිසු සංගම් එකතුවෙලා අපිට මේක වෙනස් කරල මුල් වටයේදි 1-5 දක්වා ශ්‍රේණි වල දරුවන්ට දිනපතා උදේ ආහාර ලබා දෙන්න අපිට සැලසුමක් තියෙනවා. නිකං හොද්දයි බතයි නෙවෙයි. බිත්තරයක්, මාළු කූරියෙක් එක්ක ගුණයක් තියෙන විදියට… ලෝකෙ දැන් කමියුනිටි කිචන් කියල සංකල්පයක් තියෙනවා. අපි අරගලය කාලෙ ඒවා දැක්කා. අපිට ඒවා ක්‍රියාත්මක කරන්න පුළුවන්..

හරි අපි ගොඩක් කතාකරා. අවසාන වශයෙන් දෙන්න තියෙන පනිවුඩය මොකක් ගම්පහ වැසියන්ට?

මගේ ඉල්ලීම තමයි, අපේ පක්ෂයට බලයක් ලබා දෙන්න. අපේ නායකතුමා අංක එකෙන් සහ මම අංක 19න් තරග වදිනවා.  අපි කාගෙවත් අතීතයේ හෝ වර්තමානයේ අපරාධ ඉතිහාසයක්, දූෂිත වංචාකාරී ඉතිහාසයක් නෑ. අපිට කාගෙන්වන් පළිගන්න නෙවෙයි බලය ඉල්ලන්නේ. මගේ පැත්තේ මිනිස්සු විදින දුක මම දකිනවා. ඒකට මට උදව් කරන්න ඒ බලය අවශ්‍යයි. මුදල් මත හැමදේම තීරණය වෙන්නේ නෑ. බලය අවශ්‍ය අන්න ඒකට. නැතුව මම ඇවිත් පාරෙ ලයිට් දාන්න, ටොයිලට් පෝච්චි බෙදන්න යන්නෑ. අනාගතයට යමක් ඉතුරු කරල යන්න අපි කැමතියි. මිනිහෙක් අපිට සාප කරන්නේ නැති තැනට අපි වැඩ කරනවා. අපිට ඒකට උදව් කරන්න. අපිව විශ්වාස කරන්න. ස්තූතියි.

‘මී මැස්සා‘ යූ ටියුබ් නාලිකාව සමග කරන ලද සාකච්ඡාව ඇසුරෙනි.

ඇයි ඔබතුමා  හිතුවෙ ඡන්දෙ ඉල්ලන්න. මොකද කීර්තිමත් පරිපාලන නිලධාරියෙක් විදියට ඉඳලා, ගෞරවනීය ලෙස විශ්‍රාම ලබල ඉන්න වෙලාවෙ බැනුම් අහන්නවත් ආස හිතුණද?

නෑ. මම හිතනව මේ තමා හොඳම වෙලාව. අපේ ජනවහරේ තියෙනවා එකම අවස්ථාව දෙපාරක් එන්නෑ කියල. මේ අවස්ථාවේ රටේ අලුත් දේශපාලන සංස්කෘතියක් බිහිවෙලා තියෙනවා. ඒ බිහිවෙච්ච දේශපාලන සංස්කෘතිය තුළ මෙතෙක් කල් පැල් බැඳගෙන හිටපු පක්ෂ, දේශපාලනඥයො බොහෝ දෙනා සමු අරං තියෙනවා මේ වෙද්දි… ඇතැම් පක්ෂ තේරුම් අරං තියෙනවා තව දුරටත් මේ රටේ මිනිස්සුන්ගේ ප්‍රසාදය අපිට නෑ කියල. මේ වෙලාවේ තමයි අලුත් දේශපාලන පක්ෂයකට, අලුතෙන් දේශපාලනයට එන නවකයන්ට හොඳම අවස්ථාව. ඒක හින්දා ජාතික ජනතා පක්ෂය තීරණය කරා ඉතාමත් නවක වෘත්තිකයන් රාශියක් දේශපාලනයට ඉදිරිපත් කරලා අනාගත දේශපාලන දිශානතීන් වල වෙනසක් ඇති කරන්න සහ ඇතිවෙච්ච සංස්කෘතියේ වෙනස තුළ සමබර දේශපාලනයක් ඇතිකරන්න උත්සාහ දරන්න

ඔබ රාජ්‍ය පරිපාලකයෙක් විදියට විවිධ ආණ්ඩු එක්ක කටයුතු කරා. ඒ සියල්ල ප්‍රධාන ධාරාවේ පක්ෂ සහ ඇමතිවරු. ඇයි මෙවර වෙනම අලුත් පක්ෂයකට සම්බන්ධ වෙන්නේ?

මේ පක්ෂය අලුත් පක්ෂයක් නෙවෙයි. ඉතා විශිෂ්ට කීර්තිමත්, දේශපාලනයේ කිසිම චෝදනාවක් නැති පුද්ගලයෙක් තමයි අපේ පක්ෂේ ප්‍රධාන ලේකම්තුමා වන ජ්‍යෙෂ්ඨ නීතිඥ ශ්‍රීනාත් පෙරේරා මැතිතුමා. එතුමා එක්සත් ජාතික පක්ෂය සහ සමගි ජන බලවේගය කියන පක්ෂ දෙකේම කෘත්‍යාධිකාරී මණ්ඩල සාමාජිකයෙක්. ඔහු ඒ පක්ෂ ඇතුලේ තියෙන අභ්‍යන්තරයේ ප්‍රජාතන්ත්‍රවාදය නැති නිසාත්, ඒ පක්ෂ වටා එකතුවන පුද්ගලයන්ගේ තියෙන යම් අඩුපාඩු නිසා එතුමා තීරණය කරල තියෙනවා තමුන් විසින්ම නිර්මාණය කරපු පක්ෂය නවක කණ්ඩායමක් එක්ක ඉදිරිපත් කරල තියෙනව, අලුත් පිරිසිදු සහ දක්ෂිණාංශක පක්ෂයක් ලෙස අනාගතයේදී රටේ සංවර්ධනයට දායක වෙන්න.

ඉතින් සුනිල් හෙට්ටිආරච්චි මැතිතුමනි, කවුද පක්ෂයේ ඉන්නේ ශ්‍රීනාත් පෙරේරා මහතාට අමතරව?

අපේ නායකත්වය අරගෙන තියෙන්නේ ඉතාම තරුණ ඉංජිනේරුවරයෙක්, ඒ වගේම ආයෝජන බැංකු පිළිබඳ ජාත්‍යන්තර අත්දැකීම් තියෙන මංජු නිශ්ශංක මහත්මයා. ඔහු මේ රටේ නිදහස් අධ්‍යාපනයෙන් බිහිවෙච්ච අතිවිශිෂ්ට තරුණයෙක්. මේ රටේ මේ අපි වගේ රාජ්‍ය සේවයෙන් විශ්‍රාම අරගෙන ඉන්න නිලධාරීන් වගේම ව්‍යාපාර ලෝකයේ ඉන්න දක්ෂ තරුණ ව්‍යවසායකින් දේශපාලනයට අරගෙන ඇවිල්ලා පරණ දේශපාලනයට අභියෝග කරන්න පුළුවන් මට්ටමකට මේ පක්ෂය ඇවිත් තියෙනවා.

ඔබතුමා හිටපු රාජ්‍ය නිලධාරියෙක්, රට තියෙන්නේ ඉතාම අනතුරක. බංකොලොත් වෙලා නැගිටින වෙලාවක. ඔබ මේක දකින්නෙ කොහොමද?

මේක අද ඊයේ ඇති වෙච්ච එකක් නෙවෙයි. 1994 ඇති වෙච්ච වෙනස හෙමින් හෙමින් පැතිරිලා  2006 න් පස්සේ රාජ්‍ය අංශයටත් ආවා, ඉතා විශිෂ්ට රාජ්‍ය සේවය අපකීර්තියට පත්වෙලා තියෙන්නේ දේශපාලකයා එක්ක නිලධාරීන් අනවශ්‍ය ගනුදෙනු කරන්න යාම නිසා ජනතා අප්‍රසාදයට පත්වෙලා තියෙනවා. ඉතින් නැවතත් අපි දේශපාලන සංස්කෘතියේ විශාල වෙනස් ඇති කරන්න ඕනි. ඒ වගේම රාජ්‍ය සේවයට මීට වසර තිහ හතළිහකට කලින් තිබ්බ විශ්වාසය නැවත ඇති කරන්න ඕනි නිසා තමයි අපි ජාතික ජනතා පක්ෂය නව දේශපාලන දර්ශනයක් හා ප්‍රතිපත්ති මාලාවක් එක්ක ජාත්‍යන්තර පිළිගත් ප්‍රමිතීන් අනුව මහජනයාගේ සුබසිද්ධිය සඳහා රටේ සංවර්ධනයට හදපු ප්‍රතිපත්ති මාලාවක්. මම විශ්වාස කරනවා මේ ප්‍රතිපත්ති මාලාව ඉදිරි දස වසර තුළ ක්‍රියාත්මක කරන්න පුලුවන් වුණොත් මේ රට විශිස්ට තත්වයට ගේන්නපුළුවන්. ඔබ දන්නවා ඉන්දියාව මේ වන විට චීනයට ඇමරිකාවට අභියෝගකරමින් යන්න හේතුව තමයි, එරට රාජ්‍ය සේවය ඉතා  විහිෂ්ට ලෙස එරට සංවර්ධන ක්‍රියාවලියට දායක වෙලා තියෙනවා. අපේ මේ ඉන්න බෙහෛා් දෙනා ඒ රට ගැන සතුටින් කතාකරනවා. අපි වගේම ඉන්දියාවත් ප්‍රජාතන්ත්‍රවාදී රටක්.

අපි මතක් කරමු ඔබ කටයුතු කරපු රාජ්‍ය ආයතන ගැන වගේම ඔබේ අත්දැකීම් වල යටගියාව?

මම රාජ්‍ය සේවයට බැඳෙන්නේ 1988 විතර. 1991 මම රාජ්‍ය පරිපාලන විභාගය සමත් වෙලා බදුල්ල දිස්ත්‍රික්කයේ පුහුණු නිලධාරියෙක් විදියට තමයි එන්නෙ. ඊට පස්සේ මීගහකිවුල කියන අති දුෂ්කර ප්‍රෙද්ශයේ සහකාර ප්‍රා.ලේ විදියට. අපට පුළුවන් වුණා හිටපු කෙටිකාලය තුළ රජයේ ප්‍රතිපත්ති එක්ක ඒ ප්‍රෙද්ශය හෙමින් හෙමින් සංවර්ධන මාවතට ගේන්න. ඊට පස්සෙ මම සම්බන්ධ වෙනව ඌව පළාත් සභාවට,  මගේ ජීවිතයේ ඉතාම වෙනසක් ඇතිවුණු පළාත් සභාවක්. එහි මහ ඇමතිවරයා අති විශිෂ්ට පුද්ගලයෙක් පර්සි සමරවීර කියල. ඔහු තරුණ නිලධාරීන්ට දේශපාලකයෙක් ලබාදිය යුතු මගපෙන්වීම ලබා දුන්නාත ඒකෙන් තමා අපි රාජ්‍ය සේවයේ නමක් තියාගත්තෙ. දැන් වගේ දූෂිත මිනිස්සු නෙවෙයි. අපි ගොඩක් ගරු කරපු මනුස්සයෙක්. අපිට ලොකු ශක්තියක් වුණා. ඊට පස්සෙ මම කොළඹට එනවා. එතනින් පසු වෘත්තීය පුහුණු අධිකාරිය, රාජ්‍ය ආරක්ෂක අමාත්‍යංශය, ස්ලිඩා ආයතනය, ආගමන විගමන දෙපාර්තමේන්තුව, ආර්ථික කටයුතු අමාත්‍යංශය, විශ්‍රාම වැටුප් දෙපාර්තමෙන්තුව, ජනාධිපති ලේකම් කාර්යාලය, අධ්‍යාපන අමාත්‍යංශය, මහාමාර්ග අමාත්‍යංශය සහ වෘත්තිය පුහුණු අමාත්‍යංශයේ ඉඳලා 2020 වසරේ මම විශ්‍රාම ගත්තා.

මෙච්චර අත්දැකීම් තියෙන නිලධාරියෙක් කියනව ඒ කාල අය වගේ නෙවෙයි දැන් ඉන්න අය දූෂිතයි කියල ඔබ කියනවා.. හොඳ අය හිටියද ? ඔබ හිටපු අමාත්‍යංශ වල අයත් දූෂිතයි කියලද කියන්නේ..?

නෑ නෑ… මම එහෙම කියන්නෑ සමස්තයක් ලෙස කියන්නේ. මා එක්ක වැඩකරපු අය ඉතාම හොඳ කීර්තිමත් අය, තරුණ අය වැඩකරා. මේ ක්‍රියා පටිපාටියෙන් දේශපාලඥයා අත්අරින්න බෑ. මේ ක්‍රියාවලියේ ප්‍රසාම්පාදන කටයුතු නිලධාරීන් අතේ. මේ සියල්ල සිද්ධවෙන්නේ නිලධාරීන්ගේ නොදැනුවත්කමින් නොවේ. නමුත් සමහර ඒවා වළක්වන්න බෑ. දැන් පාස්පෝට් සිද්ධිය ගන්නකො. ප්‍රසම්පාදන කටයුත්තු දෙකක් තමා ප්‍රධාන ගැටලුව වුණේ.  එක්ක පාස්පෝට් මිලදී ගැනීම අනෙක තමා එතෙක් හිටපු ඇමති වීසා නිකුත් කරපු දේට අලුත් පටිපාටියක් ගැනීම. නිලධාරීන් වැඩේ හරියට කරා. දේශපාලකයො ඇගිලි ගැහුවා. ඒකෙන් වුණේ වැඩේ පරක්කු වුණා. ඒ වගේම ඒක නොලැබිය පැතිවලට ගලාගෙන ගියා. ඒකෙන් දුක් වින්දේ මේ රටට විදේශ විනිමය ගේන විදේශිකයින් අනික් පැත්තෙන් නිලධාරීන් දඩුවම් ලබන තත්ත්වයකට පත්වෙලා. සල්ලි අරගෙන පාස්පෝට් පෝලිමේ ඉන්න රටක්ද මේක? ඒවා නිවැරදි විය යුතුයි. අපේ ප්‍රතිපත්ති තුළ තියෙනව නවීන ක්‍රමවේදයක් රාජ්‍ය සේවය හදන්න පුළුවන්. ලෝකයේ දියුණු රටවල් අනුගමනය කරන ක්‍රමවේද. නිකං කතා නෙවෙයි ඒවා. ඉන්දියාව දුප්පත් ජනතාවට ගෙවන මුදල් ඉතා පහසුවෙන් ඒ මිනිස්සු අතට යනවා. ලංකාවේ වගේ දඟලන්න, මහා ලොකු ක්‍රියාවලියක් කරන්න ඕනි නෑ. දත්ත පද්ධතිය හදපුවාම වැඩේ ඉතා පහසුයි. මම විශ්‍රාම වැටුප් දෙපාර්තමේන්තුවට යද්දි ෆයිල් අහස උසට ගොඩගැහිලා තිබුණා. ග්‍රැටිවිටි ගෙවාගන්න බැරුව තිබුණා. මම කරේ පරිගණක පද්ධතිය සම්බන්ධ කරලා බැංකු එක්ක ලින්ක් කරා. දැන් කෙලින්ම සල්ලි වැටෙනවා. ඉස්සර බැංකු දවස් 7ක් කරේ විශ්‍රාම වැටුප් හදන එක ඉස්සර. දැන් එක බොත්තමකින් ඒවා ගිණුම්ගත වෙනවා. රටේ ජාතික ධනය බැංකුවල පවා ඉතිරි වුණා. එහෙම වැඩ කරා අපි. විශ්‍රාම වැටුප් ලබන කුමන හෝ පුද්ගලයට සිද්ධ වුණා වාර්ෂිකව ජීවිත සහතික ලබාදෙන්න. මම දන්නෑ ඇයි එහෙම කොළ කෑලි දෙන්න යන්න ඕනි කියල. මම අලුතෙන් විශ්‍රාම ගිය අයට බැංකුවකට ගිහින් ඇගිලි සලකුණ ෆින්ගර් ප්‍රින්ට් ස්කෑනරයකට තිබ්බාම ලේසියෙන් අප්ඩේට් වෙන ක්‍රමය හැදුවා. දැන් තමුන් මැරිලා නෑ ජීවත් වෙනවා කියල ග්‍රාමසේවකගෙන් ලියුම් අරං ප්‍රා.ලේ කාර්යාල ගාණේ බඩගාන්න ඕනි නෑ. ඉස්සර ජීවිත සහතිකය නොදුන්නහම විශ්‍රාම වැටුප ඉබේම නවතිනවා. අර වයසක මනුස්සයා අපහසුතාවට පත්වෙනවා.  මේකෙන් පහසුව අත්විඳින්නේ විශ්‍රාම වැටුප්ලාභියා විතරක් නෙවයි, ප්‍රා.ලේකම්, ග්‍රානිලධාරී අනවශ්‍ය වැඩ වලට යොමුවෙන්නැතුව මේවා අපි සරල කරල තියෙනවා. ඒකයි තාක්ෂණය ගේන්න කියන්නේ.

ඔබතුමා කොච්චර හොඳ වුණත් මේ පාර දිනන්න පුළුවන්ද?

අපි දිනන්න තමා යන්නේ. හැබැයි අපිට ආණ්ඩු පිහිටවන්න බෑ. මේ රටේ මිනිස්සු මීට මාසෙකට විතර කලින් කරපු විප්ලවීය වෙනස තුළ ඔවුන් ඒ වැඩේ කරගෙන යාවි. හැබැයි අපි දන්නවා අනෙකුත් සාම්ප්‍රදායික දේශපාලන පක්ෂ වලට මෙරට ඡන්ද දායකයා  රැවටෙන්නෑ…මිනිස්සු හොයන්නේ නවක මිනිස්සු. අනාගතය දකින පිරිසිදු මිනිස්සු හොයන්නේ. මෙරට 2000න් පස්සෙ ඉපදිච්ච ළමයි පතන්නේ අලුත් ලෝකයක්, ඩිජිටල්කරණයත් එක්ක යන ලෝකයක්. ඔවුන්ට ඒ සඳහා දූෂණයෙන් තොර අනාගත දැක්මක් සහිත දේශපාලකයො ඔවුන් හොයනවා. මම පාර්ලිමේන්තුවට ගිහින් මෙරට රාජ්‍ය සේවකයෝ වෙනුවෙන් පෙනී හිටින්න. ඔවුන්ට එල්ල වෙලා තියෙන අපකීර්තියෙන් බේරගන්න කරුණු ඉදිරිපත් කරන්න. ඔවුන්ගේ ගැටලු පක්ෂ විපක්ෂ අයට ඉදිරිපත් කරලා විසඳුම් ලබාදෙන්න සහ ඔවුන්ව නියෝජනය කරන්න තමයි මාව තෝරගත්තේ. මම මෙරට රාජ්‍ය සේවකයන්ට පොරොන්දු වෙනවා ඔබ වෙනුවෙන් පෙනී හිටින්න මට පුළුවන්. මා විසින් ගොඩනගාත්තු නෙට්වර්ක් එක නිසා මට යමක් පාර්ලිමේන්තුවෙදි කරන්න පුලුවන්.

මේ වෙලාවෙදි ඔබේ ඒ රාජ්‍ය සේවක එකතුවෙන් තැපැල් ඡන්දය වගේ දේවල් ලැබෙයිද?

මේක නවකයන්ව ඉදිරියට ගේන්න අවස්ථාවක් ලැබිලා තියෙනවා. ඡන්දදායකටන්ට අපි ආයාචනා කරනවා පාර්ලිමේන්තුවට හොඳ මිනිස්සු ටිකක් එවන්න කියල. ඔබ විසින් පත්කරපු රජයක් තියෙනවා, ඒකට ශක්තියක් වෙන්න, ශක්තිමත් විපක්ෂයක් හදන්න හඬක් නැගිය හැකි පිරිසක් පාර්ලිමේන්තුවට අවශ්‍යයි. අපේ පක්ෂයෙත් උගත්, බුද්ධිමත් තරුණ වගේම සමබර කණ්ඩායමක් ඉන්නවා.. වැඩි කාන්තා නියෝජනයක් අපිට ඉන්නවා. අනෙක් සියලුම පක්ෂවලට අපි ඉදිරියෙන් ඉන්නවා කියල අපි විශ්වාස කරනවා. ඉතින් අපිට අවස්ථාව දෙන්න…

ඔබේ මැතිවරණ විස්තරය කිව්වොත් සුනිල් මහත්මයා.?

ජාතික ජනතා පක්ෂයෙන්, කොළඹ දිස්ත්‍රික්කයෙන් මම මැතිවරණයට තරග කරනවා අංක 18න්. විදුලි බල්බය ලකුණින්. ඉතින් මාව ඉදිරියට ගෙනාවොත් නියත වශයෙන් මම කරපු වැඩ වල අත්දැකීම් එක්ක රටේ රාජ්‍ය සේවය මහජන හිතකාමී සේවයක් කරල අපේ රටේ සංවර්ධනයට අලුත් පිටුවක් පෙරළන්න මට දායක වෙන්න පුළුවන්.